Shillong, Lber 19:
Ka jingther u ’lap bah ha ka Sngi U Blei khlem sangeh baroh shi sngi ka la pynthut shisha ïa ka jingïaseng ha ki lai tylli ki synod jong ka Balang Presbyterian kaba la pynkut mynta ka sngi ka 19 tarik Lber 2023.
Kine lai tylli ki synod kiba la pynkut mynta ka sngi ki long ka Khasi Jaiñtia Presbyterian Synod Mihngi kaba la long ha Balang Nangbah kaba hap ha West Jaiñtia Hills District, ka Khasi Jaiñtia Presbyterian Synod Pdeng kaba long ha Balang Mawpynthih kaba hap ha East Khasi Hills District bad ka Ri Bhoi Synod kaba la long ha Nongpoh kaba hap ha Ri Bhoi District.
Napdeng kine lai tylli ki synod, ka jingïaseng KJP Synod Mihngi ka dei kaba la shah pynthut naba ïa ka jingïaseng paidbah la hap ban pynlong noh ha ïingmane hadien ba ka rynsan kaba ki la dep shna ka la khyllem noh myn ha ka sngi saitjaiñ namar ka jingwan pynjulor ka lyer bad u slap.
Katba ar tylli kiwei pat ki synod, kata ka KJP Synod Pdeng kaba la long ha Mawpynthih bad ka Ri Bhoi Synod ki la pynlong beit ïa ka jingïaseng paidbah ha rynsan kaba la dep shna wat la hapdeng ka jingther u slap.
Wat la hapdeng ka jingther u slap, hynrei ki paid riewngeit ki la poi beit sha kine ki jingïaseng baroh lai tylli namar ka dei ka jingïaseng kaba ki ju ïakynduh shisien shisnem ha man ki synod.
Kum ban shu pynkynmaw ka Jingïaseng KJP Synod Sepngi kaba long mynshem taïew ha ka 12 tarik Lber, 2023 ha Balang Presbyterian Lyngkhoi ka la long kaba ïaid beit namar khlem don kano-kano ka jingpynthut.
Ka jingther u slap ryngkat ka lyer ka la sdang naduh mynsngi saitjaiñ uba la bteng haduh ka Sngi U Blei jong ka 19 tarik Lber, 2023.
