Shillong, Lber 19:
Ka National Cricket Academy (NCA) jong ka BCCI ka la dep ban jied ïa ki lai ngut ki rangïalehkai na ka Meghalaya Cricket Association (MCA) ban ïadon bynta ha ka North East Senior Men camp ka ban sdang naduh u bnai ban wan, ka ban long ha Bengal Cricket Academy ha Kalyani.
Kine ki lai ngut ki rangïalehkai kriket ki long u Raj Biswa, Kishan Lyngdoh (kiba dei ki nongtied) bad u Arbin Singh (u nongkawang bol).
Kane ka camp ne ka jaka kilan met kan sdang naduh ka 24 tarik u Ïaïong haduh ka 18 tarik u Jymmang. Baroh ki don haduh 25 ngut ki nongïalehkai na ka thaiñ shatei lam-mihngi ne North East Zone kiba la shah jied ha ka BCCI na kane ka camp.
Ka jingshah jied jong kine ki nongïalehkai ka la long ruh halor ka jinglah ban ïalehkai bha ka jong ki, ha ka aiom Syed Mushtaq Ali Trophy T20 tournament, Vijay Hazare Trophy one day tournament bad ha ka first-class Ranji Trophy.
