Shillong, Lber 19:
Ka Dorbar Mang Tyngka jong ka Ïingdorbar Thawaiñ kaba khatwei ka Jylla kan sdang ha ka Lah Sngi U Blei da ka jingkren jong u Lat sha ki dkhot ka Ïingdorbar Thawaiñ kaba khatwei ka Jylla.
Hynrei ha kane ka Dorbar Mang Tyngka, ki don ki jingjia kiba dei ha ka sien banyngkong, namar u Lat ka Jylla, u Phagu Chauhan un ai jingkren ha ka sien banyngkong.
U Lamphang ka Ïingdorbar Thawaiñ ka Jylla u Thomas A Sangma un pynïaid ïa ka Dorbar Mang Tyngka ha ka sien banyngkong.
Kumta kane kan dei ka Dorbar Mang Tyngka kaba nyngkong eh jong ka Ïingdorbar Thawaiñ kaba khatwei ha ka Jylla. Nangta kan dei ruh ka dorbar kaba nyngkong eh na ka bynta ki MLA kiba shahjied thymmai ha ka sien nyngkong.
Kane ka Dorbar Mang Tyngka kan long 7 sngi; ka ban sdang naduh 20 tarik Lber haduh 28 tarik Lber, 2023 namar ha ki sngi naduh ka 29 tarik haduh 31 tarik Lber ki dei ki sngi ban treikam ka Sorkar namar ba ka snem mang tyngka ka Sorkar kan kut ha ka 31 tarik.
Shuh shuh ka kane ka Dorbar Mang Tyngka ka dei ruh kaba ym don u nongïalam Liang Pyrshah hapoh ka Ïingdorbar Thawaiñ ka Jylla.
Ha kane ka sngi ba sdang ka Dorbar Mang Tyngka, kan don ruh ka ilekshon ban jied ïa u Symbud Lamphang ka Ïingdorbar Thawaiñ.
U Timothy D Shira, u MLA uba dei na Resubelpara konstitwensi, u la thep kyrteng ban ïakhun ïa ka ilekshon kum u Symbud Lamphang (Deputy Speaker) ka Ïingdorbar Thawaiñ.
U Timothy u la long teng kum u Deputy Speaker naduh 2018 haduh 2023, bad un bteng biang lada u shahjied biang kum u Deputy Speaker, un dei uba nyngkong ban bteng ha ka sien ba-ar.
