Shillong, Lber 19:
Ka Ri-bhoi District Cricket Association bad ka East Garo Hills (EGH) District Cricket Association ki la khur jingjop ha ka lympung ïalehkai-Meghalaya Cricket Association (MCA) U-15 Inter District Cricket Tournament 2023 ba long ha ka sngi Saitjaiñ.
Ka Ri-Bhoi ka la jop kput da 158 run pyrshah ïa ka Shillong Cricket Association-B ha ka Zone 1 kaba long ha Umbuda katba ka East Garo Hills kala jop da 6 wiket ha ka Zone 2 ha Williamnagar.
Haba phai sha ka jingïakhun ha kane ka sngi, ka Ri-Bhoi kaba la kamai 177 run bad ka SCA-B kala tied 104 run ha ka pali ba nyngkong. Haba wan sha ka pali ba ar ha ka sngi Saitjaiñ, ka Ri-Bhoi ka la kamai 138 run bad hap lut ki wiket bad kaba bun na kane ka run ka dei kaba kamai da u Gaurav Narleng uba tied 62 run na ki 56 tylli ki bol. Katba u Joseph Mathew u la khur haduh 5 wiket bad ai tang 28 run.
Ka SCA-B kala hap beh ïa ka thong ba 212 run ban jop hynrei kila lah ban kamai tang 53 run bad ki rang kawang bol ba shim bun wiket ki dei u Sanjau Sawkuta-4/21, u Suraj Kapri-3/14 bad u Benedict Jones Makdoh-2/9.
Ha kawei pat ka jingïakhun, kata ha ka jingïakhun jong ka pali ba nyngkong, ka NGH kala kamai tang 40 run bad hap lut ki wiket hynrei kane ka kynhun ïalehkai kala lah ban tehlakam ïa ka EGH ba kan kamai tang 92 run ha kaba u Chanang Sangma ula tied 50 run na ki 53 tylli ki bol. U Chingjring K Marak u la ïoh 3 wiket bad ai 14 run bad u Tengrik Sangma u la shim 3 wiket bad ai 18 run.
Ka NGH kala ïalehkai bha ha ka pali kaba ar hynrei kila hap wiket lut hadien ba la kamai tang 108 run. Ka EGH kaba la donkam ban kamai tang 57 run ban ïoh ïa ka jingjop, kala lah ban pyndep kloi ïa kane bad hap tang 4 wiket. U Chanang ula tied bun eh da 19 run khlem hap wiket.
Kawei pat ka jingïakhun kan long ha ka sngi Nyngkong, kata ha ka Zone 1, ka East Jaintia Hills District Cricket Association kan ïakhun pyrshah ïa ka West Jaintia Hills District Cricket Association bad ha ka Zone 2 ka jingïakhun kan long hapdeng ka West Khasi Hills District Cricket Association pyrshah ïa ka South Garo Hills District Cricket Association.
