London, Lber:
Ha ka thup kyrdan ba thymmai jong ka FIH, ka khubor ka iathuh ba ka kynhun ialehkai Hockey jong ki shynrang ka India ka lah kiew mynta da ar jaka, hadien ba katei ka kynhun ka lah khur ia ki arsien jingjop ha ka Pro League.
Shuh shuh ha kaba iadei bad katei ka bynta jong ka jinglah ka kynhun ban khur ia katei ki jingjop na katei ka lympung ialehkai, ka long ha ka jinglah jong ka ban khur ia ka jingjop pyrshah ia ka Germany bad kumjuh ruh ia ka Australia. Kumta ka tei ka kynhun ialehkai ka ri ka lah ka ban tam noh shakhmat ia ka Australia ha ka thup kyrdan ha ka pyrthei bad kaba lah pynlong ruh ia ka kynhun Australia ban shah pynhiar mynta sha ka kyrdan ba 5.
Ha kaba iadei bad ki jingiakhun ka India ha ka jingiaid lynti ha ka FIH Pro League, katei ka kynhun ka lah khur jingjop ha baroh ki saw jingialehkai pyrshah ia ka Germany bad ar tylli ki jingjop pyrshah ia ka Australia. Katei ka lah jia tang hapoh ki ar bnai hadien ba ka kynhun khlem da poi pyrkhat ka lah shah pynkut noh ka jingiaid lynti jong ka ha ka World Cup kaba lah long ha Bhubaneswar ha u bnai K’lyngkot tang ha ka kylla iakhun kaba 16. Hadien katei ka jingshah rem noh ha ka WC, ka kynhun ka lah weng noh ia u Mandeep Singh, Akashdeep Singh bad Amit Rohidas katba u nongapkol u Krishan Pathak ruh u lah duh ban iadonlang bad ka kynhun na ka daw shimet ka jong u.
Hadien ki ar jingshah pynrem noh ka Australia ha ka India ha ka jingiakhun ba dang shu dep, katei ka kynhun ka lah shah pynhiar kyrdan noh mynta bad kaba lah jia kumjuh ruh ia ka Germany kaba lah shah pynhiar mynta da ar jaka sha ka kyrdan ba 3 ha ka thup. Katba ka Netherlands kaba lah rah ia ka takma Rnong ha ka World Cup ka bat ia ka kyrdan ba hajrong katba ka Belgium kaba wan ba-ar ka shong ha ka kyrdan balai.
