Shillong, Lber 19:
Ka jingnang kiew ha ka jingdonkam bording ha kane ka Jylla katba nang ïaid ki sngi ka la nang buh jingeh ïa ka Sorkar Jylla khamtam ïa ka tnat bording namar ka Jylla kam lah ban tei bun tylli ki jaka pynmih bording.
Haba ïakren bad u Myntri ka tnat bording, u A T Mondal u la kubur ba ka jingpyndonkam ïa ka bording ka nang kiew na uwei u snem sha uwei snem, bad ka jingbym lah ban don shuh shuh ki jaka pynmih bording ka buh jingeh ïa ka Jylla namar donkam ban thied bording na shabar bad na ki kompani ba pynmih bording.
U Mondal u la ong ba ka jingduna bording ilektrik ka Jylla ka pynlong ruh ïa ka Sorkar ban shim ki lad ki lynti ban ïoh bording ilektrik na kiwei ki kompani bad haba ym donlad shuh, ka jingpynlip bording ka dei ka lynti kaba khatduh eh ba ka Sorkar ne ka Meghalaya Energy Corporation Limited (MeECL) ka hap ban shim.
“Ka jingpynlip bording ilektrik ka dei ka bynta ka ngim lah ban kiar, bad kane ka dei kaba hap ban leh wat ha ki snem ba la leit ruh,” la ong u Myntri ka tnat bording.
U la ong ba haba poi ka aïom tyrkhong bym hap slap, ka Jylla ka la antad lypa ban ïakynduh jingeh ha ka liang ka bording ilektrik.
Kumta u la kyntu ïa ki paidbah ban ïaishah namar ka jingeh kan don beit bad ym lah lait na ka jingpynlip ïa ka bording ilektrik katkum ka por bad ka jinglong jingman.
Nalor kata, u la ong ba ka jingshim ki lad ki lynti ban pynduna ïa ka jingduhnong ka dei kaba hakhmat eh ïa ka MeECL khnang ba kane kan long ka jingmyntoi ym tang ïa kiba trei ha MeECL, hynrei ïa ka Jylla ruh namar haba don ka jingïohnong, yn sa lah ban leh kiwei ki kam ruh.
Halor ki projek bording kiba sahteng la bun snem, u la ong ba ka Sorkar kan sa shim ïa ka rai hadien ka dorbar mang tyngka khamtam ki projek kiba rim kiba la sahteng mynta la bun phew snem kiba la dep soi ïa ki soskular ha ki phew snem kiba la leit.
Haba kylli halor ka jingpyrshah ïa ka Sorkar ban tei ïa ki projek bording, u Mondal u la ong ba ka Sorkar borabor ka shim ïa ka sur kaba pynsngew da kiba donbynta ha ki jaka ban tei ïa ki projek bording.
