Nongstoiñ, Lber 19:
Kumba arphew ngut ki bar Jylla ki la hap ban leit phai ïing noh hadien ba ka Khasi Students’ Union – Porkhadoh Area Unit ka la lap ba kim shym la don ïa ki kot ki sla kiba biang kum ka ‘labour’ laisen bad ka ‘work permit’.
Katei ka jingphah leit phai ïing jong ka KSU ïa kitei ki bar Jylla ka long ruh hadien ba ka seng hapoh ka jingïalam u President, samla Westerbose Diengngan ha ka jingïatrei lang bad ka KSU – Maweit Area Unit hapoh ka jingïalam u samla Caldinus Riangshiang ki la pynlong ïa ka jingleit khynra ha kawei na ki jaka trei hapoh Pyndengshahlang-Porkhadoh ha kaba kitei ki bar Jylla ki leit trei.
Ha katei ka jingleit khynra, ka KSU ka la lap ba ki don kumba 20 ngut ki nongtrei bar jylla bad kim don satia ïa ki kot ki sla kiba biang bad kumta ka seng ka la phah leit phai noh shi syndon ïa ki.
Ki nongkitkam ka KSU ki la ong ba ka seng ka phah ïa ka kyrwoh jingmaham kaba tyngeh ïa ki briew kiba pyrshang ban wanrah ïa ki nongtrei bar Jylla ki bym don ïa ki kot ki sla kiba biang.
“Na ka liang jong ka KSU ngin ym shah da lei-lei ruh ïa ki ba kin wan trei namar kan ktah ïa ka shongsuk shong shngaiñ jong ka dong ka thaiñ bad ka Jylla hi baroh kawei kumba ngi la ïohi bad sakhi na ka por sha ka por bad ka dei ruh ka jingpynkheiñ ïa ka aiñ ‘Inter-state migrants workmen (Regulations of employment and conditions of service) Act, 2011’ jong ka Jylla,” la ong kitei ki nongkitkam.
Shuh shuh ka KSU ka la ong ba lada ki ’riewshimet lane ki kontraktor ki leh donbor ban ïai wanrah shuh ïa ki bar Jylla ki bym don ïa ki kot ki sla kiba biang, na ka liang ka seng kan sa shim da kawei pat ka lynti.
“Ka KSU da kaba burom, ka buh ka jingkyrpad ïa ki Sordar bad ki nongkitkam jong ki shnong ba kim dei ban shah ïa ki bar Jylla ban wan trei khlem ki kot ki sla kiba biang bad ban ym ai lad ïa ki ba kin rung kin mih katba mon ha kane ka dong ka thiañ hi baroh kawei,” ki la ong.
