Lausanne, Lber:
Hadien ba u khliehduh nongpyniaid jong ka FIFA u Gianni Infantino u lah shah jied biang sa shisien ban pyntyllun thymmai ia ki kam ki jam jong ka synjuk baroh kawei, na ka liang jong utei u nong-ialam u pynbna paidbah ba ka khusnam song pisa na ka bynta ka lympung ialehkai phutbol World Cup ki kynthei ka ban sa wan ka ‘Women’s World Cup’ ka ban sa long ha ki ar tylli ki ri kata ha Australia bad New Zealand, kan long ka khusnam song pisa ka ban bun haduh lai shah ban ia ka song pisa jong ka lympung ialehkai ba lah dep ban pynlong ha u snem 2019.
Shuh shuh ruh na ka liang jong utei u nongpyniaid u lah pynpaw ruh ba ka Tourist Board jong ka Saudi Arabia kan ym ai ia ka jingkyrshan ne ban theh pisa na ka bynta katei ka lympung ialehkai.
U Infantino u lah pynpaw ruh ba ka song pisa kaba haduh kyllum baroh bad ruh ka jing-iohnong na ka bynta ka jingpynkhreh bad ruh na ka bynta ki klob ialehkai bapher bapher kan long $152 million; kata ka jingpynkiew mynta na ka $50 million song pisa jong u snem 2019 bad tang $15 million ha ka lympung ialehkai ba lah dep ban long ha Canada saw snem mynshuwa.
Kumta ruh katei ka lympung ialehkai World Cup jong ki kynthei ha u bnai Naitung bad Nailar mynta u snem kan long ruh ka sien kaba nyngkong ha ka ban sei madan ia ki 32 tylli ki kynhun ialehkai da kaba pynkiew mynta na ka 24 kynhun ialehkai kiba lah dep ban shimbynta ha ka lympung jong u snem 2019 kaba lah long ha France bad ha kaba ia ka trophy jingjop lah rah da ka USA.
Katei ka jingpynkiew bun ka song pisa ha kane ka sien kaba mynta jong ka lympung ka dang iai kah syrngiew haba nujor sha ka $440 million song pisa ha ka lympung ialehkai World Cup 2022 kaba lah kiew sha ka 32 kynhun ialehkai.
U Infantino u iathuh ruh ba katto katne na ki nongpyllait paidbah ia ki jingialehkai ka lympung ki lah tyrwa haduh shipsah sien dun ana ka bynta ban ioh lum khubor bad pyni paidbah ia ki jingialehkai jong ka lympung, watla ka jingbun jong ki nongpeitkai ka long jan mar katjuh lane duna ia ka 20 %. Shuh shuh u lah iai ban ruh ba ka FIFA ka lah shim ia ka sienjam mynta shakhmat ym tang da kaba shu khlei da ka ktien hynrei kaba lah pyni ruh da ki kam.
Ka jingpynbna ia kane khusnam song pisa lah pynsawa bad kren paidbah da ka ‘Global Players Union FIFPro. Ka kaiphod halor ka jinglah ban pynurlong ia ka tei ka bynta na ka liang jong ka Football Australia bad New Zealand Football ki pynpaw ia ka jingpdiang sngewbha ka jong ki halor katei ka rai ba lah wanrah mynta da ka FIFA.
