Imphal, Lber:
U Myntri Rangbah jong ka jylla Manipur, u N Biren Singh ha ki khyndiat sngi kiba la leit noh u la pyntip ba ki lad trei kam ba beaiñ na ka ri Myanmar ki la donkti ha ki kam khaïi drok beaiñ ha Manipur bad na la liang ka Sorkar Jylla kan dang ïai pynbteng ïa ka thma ban ïakhun pyrshah ïa ka jingjyllei jong u drok ha ka jylla Manipur.
Ïa katei, u Myntri Rangbah u la pynbna hadien ba ki bor pulit jong ka jylla ki la ïoh ban kurup ïa haduh 20.26 kilo u symbai ‘tiew poppy bad ïoh kem ruh ïa 2 ngut ki samla na ka shnong Old Boljang, Kangpokpi District ha ryngkat 4 tylli ki ar shaka ba ju pyndonkam ha Myanmar.
Haba ïakren bad ki lad pathai khubor, na ka liang u Myntri Rangbah u la ong ba ha ka por ba ka sorkar jylla ka dang don bynta ban rat dyngkhong ïa ki kam rep beaiñ ïa u ‘tiew poppy, ka jingïoh kurup ïa ki symbai ‘tiew poppy ba la wan ban pynpoi na sha ri Myanmar ka pyni shai ba kitei ki kam beaiñ ki la wanrah ïa ki dieng pyngkiang bad pynthut ïa ka synshar khadar jong ka sorkar jylla bad kumjuh ruh ïa ka imlang sahlang jong ka jylla.
Na ka liang u Myntri Rangbah u la ïathuh shuh shuh ba ka long kaei kaei kaba sngewsoh bad watla na ka liang ka sorkar jylla ka la shim ïa ki sienjam kiba bha tam na ka bynta ka bha ka miat jong ka imlang sahlang, pynban ki dang katto katne ki briew kiba pyrshah ïa kitei ki sienjam ba bha jong ka sorkar – ban rat dyngkhong ïa u droks na ka jylla.
Na ka liang u Myntri Rangbah u la kyntu bad kyrpad ruh ïa ki nongshong shnong ka jylla bad ïa kiwei kiwei ki briew kiba don bynta ha ki kam khaïi droks ba ki dei ban kiar na ki kam ïaleh pyrshah ïa ka sorkar bad kumjuh ruh ïa ka imlang ka sahlang.
Ka jylla Manipur ka dei kawei na ki jylla jong ka Thaiñ Shatei Lam Mihgni kaba don ïa ka lynter khappud kaba jngai haduh 390 km bad ka ri Myanmar.
