Aizawl, Lber:
Ki bor sorkar jong ka jylla Mizoram ha ka 18 tarik mynta u bnai ki la pyntip ba uwei u dkhot jong ka seng kieng atiar Kuki-Chin National Army (KCNA) – ka ba na ka ri Bangladesh, u la shah kem ha ki bor shipai ka Assam Rifles na kawei ka shnong kaba don ha ka thaiñ Lawngtlai district, Mizoram.
Kat kum ka kyrwoh ba la pyllait da ka tnat shipai la pyntip ba ïa utei u dkhot ka KCNA u ba la tip kyrteng kum u Faliansang Bawm (29 snem ka rta) la ïoh ban kem na kawei ka ïing kaba don ha ka shnong Bungtlang – ka ïing kaba u la shong la sah la katto katne taiew.
Kat kum ka kyrwoh la ïathuh ruh ba ki bor shipai ki ïoh kem ïa u Faliansang hadien ba ki la leit ban pynlong ïa ki jingkhynra ha ka sngi Thohdieng kaba la dep. Hadien ka jingshah kem, la leit ban aiti noh ïa u sha ki bor pulit jong ka jylla Mizoram na ka bynta ban pynlong ïa ki jingtohkit kiba dang sah.
Kum ban shu ïathuh hangne, la ïathuh ba dang ha ka 10 tarik mynta u bnai ki bor shipai ka Assam Rifles ki la ïoh ruh ban kem ïa uwei u dkhot jong ka seng KCNA na ka shnong Hmunnuam, Lawngtlai District.
Kat kum ki jingïoh lum khubor la ïathuh ba hadien ba ki bor shipai jong ka ri Bangladesh ki la leit ban pynlong ïa ki jingkhynra kiba jur pyrshah ïa ki dkhot jong ka KCNA, ki la don ruh haduh kumba 500 ngut ki paidbah kiba la mih noh na ka thaiñ Chittagong Hill Tracts, Bangladesh bad wan ba rieh tngen ha ki shnong jong ka thaiñ Lawngtlai district.
