New Delhi, Lber:
Ha kaba ïadei bad ka jingïakren halor ka jingplie paidbah ïa ka Science Laboratory hapoh ka jingtreikam jong ka Karnataka Model School Guidance, bad kumjuh ki skul kiba thymmai ha ka shnong Konanakere kaba don ha ka thaiñ Shiggaon, u Myntri Rangbah u la ong ba lyngba ka jingïashim bynta jong ki paidbah, ki la don kumba 151 tylli ki kamra klas ba la lah ban shna ha ka Assembly konstitwensi jong u, bad ha ki lai snem ban wan, ka sorkar ka la thmu ban shna shuh sa ïa kumba 500 tylli ki kamra klas ha ka thaiñ.
“Ka sorkar ka la pyllait ïa kumba T. 280 klur ka pisa na ka bynta ban shna la kijong ki paiñ khana na ka bynta ki khynnah shynrang bad ki khynnah kynthei ha baroh ki skul sorkar kiba don ha kylleng ka jylla hashwa ka 15 tarik, Nailar, kaba dei ka sngi rakhe ïa ka Independence Day. Hapoh ka jingtreikam jong ka Atal Tinkering Model, ïa ki jingïarap bad jingkyrshan la pyllait na ka bynta ban shna ïa ki Tinkering Laboratory,” la ong u Bommai.
U la bynrap shuh shuh da kaba ong, ba ha Shiggaon Assembly konstitwensi, ki la don kumba 10 tylli ki PU College ïa kiba la mang ban shna bad la buh hukum ba la dei ban ai jinghika na ka bynta ïa baroh ha ki Subject Science ha kine ki kolej.
U Myntri Rangbah u la ong ba ha ryngkat ka jingïatreilang bad ka Bill & Milind Gates Foundation, kaba long ka Global Philanthropic Organisation ba la pynïaid da u nongshemlang ïa ka Microsoft u Bill Gates bad ka lok barim jong u ka Melinda, ïa ka Karnataka Model School Guidance prokram la pyntreikam ha Haveri, Davangere, Tumkur, bad Yadgir distrik.
“Ka la don ka jingkylla kaba haduh katta katta ha kaba ïadei bad ka pule-puthi bad ka koit ka khiah. Ha ki ar bynta jong ki dorbar mang tyngka ba la leit, ka tnat ka koit ka khiah ka la ïoh ban pdiang da kumba 11 per cent bad ka tnat pule-puthi da 12 per cent ka pisa ba la mang na ka bynta ka jingpyntreikam jong ki ha ka dorbar mang tyngka. Ha ka jingïatreilang bad ka Jindal Company, ki la don kumba 10 tylli ki skul ha ka konstitwensi jong nga kiba la nang kiew halor ka jingthmu ban kyntiew ïa ki katkum ka kyrdan jong ki jaka pule,” la ong u Myntri Rangbah.
