Shillong, Lber 20:
U Bah Jemino Mawthoh, uba dei u General Secretary ka United Democratic Party (UDP) u la ong ba ki la mih bun ki jingkylli bad jingkynthoh ba balei ka UDP ka leit ïasnoh biang ha ka sorkar MDA-II ba lamkhmat da ka NPP.
“Nga kwah ban pynkynmaw sha ki paidbah, ba ka UDP baroh 5 snem kata hapdeng u snem 2013 haduh 2018, ka la shong ha ka Liang Pyrshah bad rah ruh bun ki mat ba ïadei bad ka bha ka miat ka jaidbynriew, hynrei hadien ka ilekshon ha u 2018 ka la hiar pynban ha ka jingïoh jingjop ki MLA,” la ong u Bah Jemino haba kren sha ki lad pathai khubor hadien ba la wai ka jingïalang jong ka Central Executive Committee kaba la long ha ka sngi Nyngkong ha shlem treikam ka seng.
U Bah Jemino u la ong, “Ha u snem 2013 ka UDP ka la jop 8 ngut ki MLA, hynrei watla baroh 5 snem ngi la shong ha ka Liang Pyrshah bad ruh ban pynsngew ka sur kaba khlaiñ. Hynrei, ha ka ilekshon ha u 2018, na ka 8 ngut ki MLA ba ngi jop ha u 2013 ngi la hiar pynban sha ka 6 ngut.”
Une u nongïalam ka UDP u la ong ba ki paidbah mynta ki kynthoh bad kylli halor ka jingleit kyrshan biang ka UDP ïa ka Sorkar, hynrei ha u 2018 pat hadien ka ilekshon, ba bun kim kylli ïa kane ka jinghiar jong ka UDP.
Ha kawei pat ka liang, u Bah Jemino u la ong, ha kane ka jingïalang CEC ba la shong hadien ka ilekshon, la ïoh ban ïakren bad bishar bniah halor ka jingmih bad ruh ban peit bniah ïa ka jinglong jingman jong ka jop bad ka rem ka seng. Ha kane ka jingïalang la wan ïashim bynta da ki nongïalam district bapher bapher, ki MLA, MDC ki kyrtong ka seng.
U Bah Jemino u la ong, wat lada ka jingkhmih lynti ka UDP ka long ban jop kham bun ha kane ka kynti, hynrei na ki daw ba bun, ym shym la ïoh bun ki MLA, hynrei kum ka seng ka la lah ban leh kham bha namar lada ïanujor bad ka ilekshon 2018 ka UDP ka la jop 6, mynta ha u 2023 pat ka la jop haduh 11 ngut.
Ym tang ka jingjop kham bun ki MLA, hynrei ka UDP ka la lah ban kiew ruh ha ka jingïoh vote ne ka ‘vote share’ haba phai ha rilum Khasi Jaiñtia ka UDP ka ïoh 24.62 persen, katba ka NPP tang ha rilum Khasi Jaintia ka la ïoh 26.44 persen.
“Watla ka UDP ka la leh kham bha ban ïa ka ilekshon ha u 2018, kum ka seng watla ngi la khmih ban jop bun ban ïoh ïalam ïa ka sorkar, hynrei ngi hap burom ïa ka rai jong u paidbah, hap ban pdiang ïa kaei kaba la jop,” u la ong bad bynrap ba nangne shakhmat kum ka seng kin dang ïai trei bad pynkhlaiñ shuh shuh.
Ha kane ka jingïalang, la ïakren halor ka jingpynkhreh na ka bynta ka ilekshon ha Sohïong konstitwensi bad kumjuh ruh ïa ka ilekshon MDC bad MP ka ban long ha u snem ban wan.
Ha kaba ïadei bad ka ilekshon MDC bad MP la dep ban aiti sha ka core committee jong ka seng ban pyrkhat kumno ban ïaid shakhmat bad ban pynthikna ruh ba ïoh ka jingjop.
