Lahore, Lber:
U Myntri Rangbahduh barim jong ka Pakistan, u Imran Khan, ha ka Sngi U Blei u la maham bad kular ba un pynhiar kput ia uwei pa uwei u heh pulit uba iadon kti ha ka jingleit khynra ia ka jaka sah jong u ha Zaman Park. Ha kane ka sngi ka la don ruh ka jingpynshitom beiñ ia ki dkhot jong ka seng jong u hapdeng jong katei ka jing-leit khynra kaba long ha ka taiew ba la dep.
La ong ba katba u Khan u dang la leit mih sha ka ïingbishar jong ka Islamabad ha ka Sngi Saitjaiñ, da ki 10,000 hajar ngut ki pulit ba la kieng atiar, ki la leit ban khynra sha katei ka jaka sah jong u ha Zaman Park bad ki la leit ban shoh beiñ bad kem ruh ia bun ngut ki dkhot jong ka seng Pakistan Tehreek-e-Insaf (PTI), ha kaba ki pulit ki la kynnoh bad kam ruh ba ki la ioh ban kurup ia ki tiar siat bad ki bom ‘petrol’ napoh ka iingsah jong u Khan ha katei ka sngi.
Watla katta, la ong ba ki nongbud jong u Khan ki la lah ban pyn jaijai ia ka jinglong jingman ha katei ka jaka sah jong u ha katei ka miet Sngi Saitjaiñ hadien ka jingwan phai jong u na ka jingpynsngap jong ka ïingbishar haba iadei bad ka jingjia ha Toshakhana.
Kumta, haba ai jingkren sha ki paidbah ha ka Sngi U Blei, u Imran Khan u la pynpaw ka jingbitar pyrshah ia kito ki heh ka tnat pulit Punjab kiba iadon kti ha ka jingleit khynra ia ka jaka sah jong u ha katei ka sngi.
Ha katei ka jingleit khynra, la ong ba ki pulit ka Punjab ki la pyndonkam da ki tiar kiba khlaiñ ban pynpait bad pynpra ia ki jingbuh- jinsat jong ka iingsah jong u, bad ka kurim jong u ruh ka don ha iing ha katei ka por ba kitei ki heh ki leit ban khynra hapoh ka iingsah jong u.
Kumta, ruh u Khan u la ong ba ha ka jingshisha u la kwah ban ai jingkren sha ki paidbah naduh katei hi ka miet Sngi Saitjaiñ, hynrei namar ka jingbitar ka la tap ia u, um lah shuh ban kren kumba u la thmu ha katei ka sngi. Namarkata ruh u la kynnoh ba ka Punjab IG ka la pynkheiñ syndon ruh ia ki kyndon jong ka Lahore High Court (LHC).
Namar kata la ong ba ka seng jong u kan sa leit ban ujor bad ban iasaid hakhmat ka ïingbishar halor katei ka jingleh lyndet jong ki heh ka Punjab, nalor ki kyndon ba ka ïingbishar ka la buh bad ka la ai jingiada ia u bad ia ka iing jong u.
Shuh shuh ruh la ong ba hadien kumba katto katne por, u heh jong ka seng PTI, u Fawad Chaudhry u la phah ia ka shithi sha u Chief Secretary jong ka Punjab ba la kyntu ia u ban ujor da ka ejahar pyrshah ia u heh ka PML-N u Maryam Nawaz, Naqvi, Dr. Usman Anwar bad kumjuh ruh ia kiwei de kiba iadon kti ha ka ban pynlong ia katei ka jingkhynra ha ka jaka sah jong u Khan ha katei ka sngi.
