Chandigarh, Lber:
Naba u nongkyrshan jong ki nong Khalistan u Amritpal Singh u dang shah thwet jur, ki pulit jong ka Punjab ki la buh sa ar tylli ki jingmudui kiba dang thymmai pyrshah ïa u bad ïa ki nongïarap jong u, kawei ka long halor ka jingryngkang na ki jingker ba la buh da ki pulit ha ka por ba u la phet na kti jong ki pulit ha ka sngi Saitjaiñ bad kawei pat ka dei halor ka jingïoh kurup ïa ka suloi na ka kali jong u kaba u la ieh ha lynti.
U kñi bad u nongñiah ka kali jong u kiba long ki nongkyrshan jong ki nong Khalistan bad u heh nongïalam jong ka Waris Punjab De Amritpal Singh ki la leit ban aiti ïalade ha kti jong ki pulit katba u Amritpal u dang shah thwet jur hynrei na ka liang jong ki pulit ki la ïoh ban kurup ïa ka Mercedes (SUV) jong u.
Kum shi bynta ban pyntikna halor ka jingleit pyndem jong kine ki arngut u Deputy Inspector General of Police (Jalandhar Range) u Swapan Sharma bad u Senior Superintendent of Police jong ka Jalandhar Rural u Swarandeep Singh Amritpal u la ong ba u kñi jong u Amritpal u Harjit Singh bad u nongñiah kali jong u u Harpreet Singh ha ka miet jong ka sngi U Blei ki la leit ban pyndem ïalade hajan ka jaka mane blei jong ki Sikh ha ka thaiñ Mehatpur kaba don ha Jalandhar. Katba ka jingleit thwet kaba jur ïa u Amritpal ka dang ïai bteng.
“Ngi la lap ïa ka Sports Utility Vehicle Mercedes ha kaba u Amritpal u la pyndonkam ban leit jingleit,” la ong u Swarandeep.
Ki pulit jong ka Punjab haduh ka janmiet jong ka sngi U Blei ki la ïoh ban kem ïa kumba 112 ngut ki nongbud jong u Amritpal. Nalor ka jingpynlong ïa ka jingleit thwet ïa u Amritpal sha kylleng ki jaka jong ka jylla, ki pulit ki la pynlong ruh ïa ka jingleit thwet ïa u da ki kali sha kylleng ki jaka kiba don ha ki distrik bapher bapher.
Ki la don ruh sa kumba 34 ngut ki briew kiba la long ki nongïarap jong u kiba la shahkem ha ki bynta jong ka Punjab ha ka sngi U Blei, ha kaba da kane, baroh kiba la shahkem haduh katei ka sngi, ki la long haduh mynta 112 ngut.
