Srinagar, Lber:
U Vijay Kumar, u ADGP ka Kashmir, u la ong ba ki la don sa tang kumba 28 ngut ki lehnoh ka thaiñ kiba dang treikam ha ka thaiñ Kashmir.
U la bynrap shuh shuh da kaba ong ba na ka bynta baroh kito kiba la ai jaka rieh ne jingkyrshan ïa ki lehnoh ha ki por ba la leit, yn sa pynshitom da kaba tyngeh katkum ki kyndon jong ka aiñ.
U Kumar ha ka jingai jingkren jong u sha ki nongthoh khubor hadien ka jingdon bynta ha ka lympung ïalehkai jong ka Football Cricket Tournament jong ka All India women, u la ong, “ki la don ki kyndon ba la buh ha kaba la ong ba lada jia ba don ki jingïasiat ba markylliang ha kano kano ka ïing ne kaba la shah pyndonkam bakla ha ki lehnoh, ngin sa kem ïa ki briew hynrei mynta la pyntreikam ha ka ban kurup ïa ki jingdon jingem. “
Ha kaba ïadei bad ki lad ai jingïada ha ki sngi ban don ka Yatra, u la ong, “Ngin sa pynbiang bad pynbun ïa ki kynhun shipai ïada ri. Ngin sa shim ïa ki buit pyntreikam ban ai jingïarap bad nga kyrmen ban lah ban pynduna ïa ka jingdon jong ki lehnoh haduh ban da dei ki sngi ban sdang ïa ka Yatra. Nga dap da ka jingkmen ban pynsngew sha phi ba ha khana pateng jong ka Jammu & Kashmir, ka la long ba ki lehnoh ki la duna shibun ki ban treikam haduh mynta. Ka jingdon jong ki ka la hiar ha kaba ki la don sa tang 28 ngut.”
Ha kine ki khyndiat bnai ba la lah, ki kynhun tohkit ki la pynlong ïa ka jingleit thwet bad khynra pyrshah ïa ki lehnoh bad ki nongïarap jong ki lehnoh. a kine ki khyndiat bnai ba la lah, ki kynhun kum ka NIA, SIA, bad kiwei pat ki la kurup noh ïa ki jingdon jingem jong palat 300 ngut ki lehnoh bad jong ki nongkyrshan jong ki.
Ha kaba ïadei bad ka jingpynkhlaiñ ïa ka jingpahara na ka bynta ka jingdon jong ka G20 Meeting ha Kashmir, kaba la thmu ban pynlong ha u bnai Jymmang, ki pulit jong ka JK, ki shipai ka tnat CAPF, bad ki shipai ka tnat Army ki la pynkhreh na ka bynta ban ai ki lad jingïada.
