Itanagar, Lber:
Ki bor pulit ka jylla Arunachal Pradesh na ka thaiñ Namsai ha ryngkat ka jingïatreilang bad ki bor pulit ka thaiñ Tinsukia ha ka 20 tarik mynta u bnai ki la ïoh ban kem ïa 4 ngut ki runar kiba la donkti ha ki kam beaiñ ban rong tuh ïa haduh 26 tylli ki thuk thuk na ki thaiñ bapher bapher jong ka jylla.
Kat kum ki jingïoh lum khubor la ïathuh ba ki runar kiba la shah kem ha ki bor pulit ka Special Investigation Team (SIT) ki kynthup ïa u Ripunjoy Duwara (27 snem ka rta) na Tinsukia District, Assam, u Babul Buragohain (35 snem ka rta) na Sumonipathar, Sadiya District, Assam; u Sanjit Shakti (32 snem ka rta) na ka shnong Kherani, Namsai District bad u Girin Saikia (37 snem ka rta) na ka thaiñ 2nd Mile, Namsai District, Arunachal Pradesh.
La ïoh jingtip ba na ka liang ki bor pulit ka SIT ha ryngkat ka jingïoh ïa ki lad jingïarap na ki bor pulit ka thaiñ Tinsukia ki la ïoh ruh ban kurup ïa haduh 26 tylli ki thuk thuk na ki shnong bapher bapher kiba don ha ka thaiñ mihngi jong ka jylla Arunachal Pradesh.
Kat kum ka kyrwoh la ïathuh ba haduh 4 tylli ki thuk thuk kiba la shah rong tuh mynshwa la ïoh ban kurup biang na ka thaiñ Dambuk (Lower Dibang Valley), kawei na ka shnong Anini (Dibang Valley), 9 tylli na ka shnong Mudoi (Changlang District) bad 12 tylli na ka thaiñ Insu/Insa – ki thaiñ ba hap hapoh ka jingkhmih jong ki bor pulit ka Chongkham PS, Namsai district.
Halor katei ka jingjia la ïathuh ba na ka liang ki bor pulit ki la pynrung da ka mokotduma na ka bynta ban pynlong ïa ki jingtohkit kiba dang sah – khnang ban ïoh kem sa ïa kiwei kiwei ki runar bad kumjuh ruh ban ïoh kurup biang sa ïa kiwei kiwei ki thuk thuk kiba dang jah rngai.
