Delhi, Lber:
Katkum ka khubor ba la ioh lum ka iathuh ba u Kumar Sangakkara un iai bteng ban ai ka jingshakri ha ki ar tylli ki kam kiba u ju iai pyntyllun ha ka kynhun ialehkai Kriket ha ka IPL kata ha ka Rajasthan Royals’ kum u Director of Cricket bad ruh kum u nongpyniaid ba ha khliehduh ka kynhun ka ban iarap lang da u Trevor Penney.
Shuh shuh ruh ka khubor ka iathuh ba uwei pat u rangialehkai ka Sri Lanka u Lasith Malinga un iai bteng ban ai ka jingshakri sha ka kynhun kum u nonghikai ia ka kynhun kawang bol ryngkatlang bad u Zubin Bharucha kum u Strategy, Development bad Performance Director, u Giles Lindsay kum u khlieh ka Analytics & Technology, Siddhartha Lahiri kum u Support Coach bad u Dishant Yagnik kum u Fielding Coach.
Katei ka kynhun ialehkai IPL hapoh ka jingialam jong u Sanju Samson kum u kapten, ka lah nang iai pynneh-pynsah ruh ia ka kam shakri jong u John Gloster (Head Physio), Dr. Rob Young (Team Doctor) bad ia u AT Rajamani Prabhu (Strength & Conditioning Coach).
Na ka bynta ka jingiaid lynti ba sdang jong katei ka kynhun ialehkai ha ka IPL mynta u snem, katei ka kynhun kan sdang ia ka jingiaid lynti ka jong ka ha ka 2 tarik u Iaiong ha Hyderabad da ka jingiakhun pyrshah ia ka Sunrisers Hyderabad.
