Shillong, Lber 20:
Ka Archery Association of Meghalaya (AAM) ha ryngkat ka jingïatrei lang bad ka Archery Association of India (AAI) ka la sdang ïa ka jingïakob siatkhnam ba la tip kum ka 2nd NTPC National Ranking Archery Tournament (NRAT)-2023 ha ka Lah Sngi U Blei ha Sports Authority of India, Training Center, Shillong.
Ha kane ka jingïakob la wan ïashim bynta da ki nongïalehkai na kylleng jong ka ri kaba la plie pyrda da u Secretary General ka Archery Association of India u Pramod Chandurkar kum u kongsan ha ryngkat ka jingïadon lang ki nongïalam ka Archery Association of Meghalaya bad kiwei.
Ha kane ka sngi la sdang shwa da ka jingïakob jong ka Sub-Junior na ka bynta ban ïaknieh ïa ki kyrdan ïalehkai jong ki.
Haba ai jingkren ha kane ka jingplie ïa kane ka jingïakob siatkhnam, u Pramod Chandurkar u la ong ba ka jingpynlong ïa kane jingïakob ha kane ka nongbah Shillong ka long kaba biang eh namar ka long kaba pyngngad bad ka long kaba biang eh ïa ki nongïalehkai ba kin pyni ïa ki sap ki jong ki. “Ka nongbah Shillong ka ïasyrïem bad ki jaka ha ka dewbah Europe bad kumjuh ha Scotland. Te kum ki khynnah ïalehkai ki dei ban shim ïa kane ka kabu ksiar ba kin ïalehkai bha bad ban pyni ïa ki sap ïalehkai jong ki.”
U la long ruh ba kane ka lympung ïalehkai ka long kum ka lad hashwa ban saiñdur ïa ki khynnah khnang ba kin ïoh ban ïashim bynta ha ka Olympic Games ka ban long ha u snem 2028 bad 2032.
Hadien ba la kut ka Sub-Junior, yn bteng sa ka Junior naduh 22 haduh 25 tarik, bad khatduh eh yn pynlong sa ka kyrdan Senior naduh 25 haduh 27 tarik mynta u bnai.
