D. H. Kharkongor
Ïa Ia uba bun balang, khamtam ia u paid knup paid trap ba shida jinglong, ba ka lah long biang kumto kumjuh kumba ha shwa jong ka Tamasabah ba Shisien San Snem. Sa shisien ba un ia wad ia la ki lad ki lynti ban iohia la ka kamai ka kajih, ban hap ban ia tista bad ban ia minot ruh thop ha la ka kam ka jam. Sa shisien ban ia angnud ban nym thut ka kamai ka kajih ka jong u, ba kan bha ka kamai ka kajih bad ba yn kham ioh ruh ia ka lad ban kynshew kyndiap. Sa shisien ban ia angnud ban lait na ka pang ka shitom bad ban dang lah ban kyrshan ia ka pule ka puthi ka jong ki khun ki kti. Sa shisien ban angnud ban biang lem noh ka lad sumar sukher bad ruh ka pule puthi tang ha la ka jong ka shnong ka thaw. Sa shisien ban angnud ban lait na ka pan kylliang, ka shim kylliang bad khamtam eh na ka shim ram shim shah. Sa shisien ban angnud ban lait na kaba hap ban byndi byndop ia la ki jingdon ki jngem. Sa shisien ban lah ban don lem noh ia la ka jong ka jaka ka puta, na ka bynta ban rep riang bad ban don lem noh ruh ia la ka jong ka ïing ka sem.
Kumta sa shisien u paid knup paid trap ba shida jinglong un hap ban ia trudbiang ia ka maw ka dieng. Uba kham bun napdeng jong ki un dang iaimad ia kijuh ki jingeh ki jingshitom ha ka liang ka leit ka wan bad ruh ha ka liang ka kit ka bah ne ka rah ka rong. Kaba katno tam ia kiba pang kiba shitom. Un dang hap ban ia leit kit leit bah shaduh sha Sor Shillong ia kiba pang kiba shitom jur bha. U bapli un dang hap ban iaipynlut ym tang ia la ka por kaba kordor hynrei haduh ia la ka bor met tang na ka bynta ka shi borti ka um bam um dih. Un dang hap ban dang leit sum bad leitsaitjain shaduh sha ki phud um kiba shapajih na la ka shnong ka thaw. Un dang hap ban iai mad ia ka jingbym thikna jong ka bor ding iliktrik. Uba kham bun napdeng u paid knup paid trap ba shida jinglong un dang iaimad jingeh ban lah ban kyrshan ia ka pule ka puthi ka jong ki khun ki kti. Uba kham bun napdeng jong ki un dang iaishem shitom ban lah ban don lem noh ia la ka jong ka jaka rep riang ha kaba un don lem noh ruh ia la ka jong ka ing ka sem.
Ka jingangnud ka jong u paid knup paid trap, ba shida jinglong, ka iapher, kumba iapher ka sngi bad ka miet, na ka jngangnud ka jong kine ki ‘businessmen cum politicians’, kiba la ioh lad ban ia bsut biang sa shisien kumne,sha kat ka ïing Dorbar Thaw-ain jong ka jylla. Ka jingangnud kaba kongsan tam eh ka jong kine ki ‘businessmen cum politicians’ kam dei tang ka jingiai jop bad iai jop ka jong ki, ha man la ka San Snem kaba kin dang iaimih madan ban ia aireng hynrei ba kin dang iaidon ruh ha ka bor ne ba kin dang iai ioh ban bat halade ia u lakam jong ka synshar khaddar. Ka jinglah ka jong ki ban ioh bat ia u la kam jong ka synshar khadar ka lah dei lypa ka kabu ksiar ne ka ‘business opportunity’ ia kiba kin nang pynheh pyniar (grow & expand) shuh shuh ia la ka jong ka ‘business empire’ ka jong ki.
Kumta kaba nyngkong nyngshap ia ki mynta kumne, ba ki la don biang ha ka bor, ka long ba kin ioh ban khyllie biang shwa lane ‘recover’ biang shwa ia kat kaba ki la pynlut pynsep ne ‘invest’ ha kane ka jingiathied khlieh sniang bad kjat sniang ka jong ki, kaba dang shu dep shen. Kin hap ban khyllie biang shwa ym tang ia kaba ki la pynlut pynsep na ka bynta ialade shimet hynrei wat ia kaba la pynlut pynsep da kita kiba ha la ka nudkhohsiew ka jong ki hi, kata, ki kyrong ki jong ki hi, kiba dang shu dep rem noh kha-ma-kha myn ha kane ka ‘Tamasa Shisien San Snem’kaba dang shu dep shen.Katba ia uta uwei u ‘businessman cum politician’ uba na Nartiang ba kita kiba la rem noh ki dei u khun trai lem bad u kynum u jong uta u khun trai u jong u. Kaba ia uta uwei pat u ‘businessman cum politician’ jong ka Mawthadraishan ba kita ki dei ki arngut ki shipara kiba u ia dei shi para khatrai bad ki, lem ruh bad uta uwei pat uba dei u bakhatrai u jong u. Ia uta uwei pat uba na Sohra ba uta uba la rem noh u dei uba shibakhatrai ba u.
Kine ki’businessmen cum politicians’ kiba la jop bad ba don mynta ha ka bor ki donkam ruh ban nang pynheh pynkhraw shuh shuh ia la u kynshew uba kin mang kyrpang sana ka bynta ka San Snem ka ban sa wan, katta, ban lah ban thong kham bun ha kata ka jingiakhlieh dor biang kaba Shisien San Snem, ia ki khliehsniang bad ia ki kjat sniang. U kynshew uba da kham kyrpang, uba ym tang na ka byntaialade shimet hynrei na ka bynta ki ‘khyndan’ ki jong ki hi, kata, ki ban sa ia mih madan ban ia aireng biang na ki ‘Assembly Constituencies’ kiba pher ba pher, jong kane ka Ri Lum Khasi Jaintia ka jong ngi. Ym tang kumta hynrei kin hap ruh ban pynhun pynsngewbha kyrpang ia la ki nongkyrshan kiba radbah ki jong ki, kiba dei ruh ki ‘businessmen’, kumba long ma ki hi.
U paid knup paid trap ba shida jinglong bad uba kine ki ‘businessmen cum politician’ ki la dep ban pynshongdor tang kumba San hajar tyngka shikhlieh, kata ruh na ka bynta baroh ki San Snem, un sa wan tad hadien jong kitei kiei kiei baroh. U paid knup paid trap ba shida jinglong um don hok ban iasngewrem wei ba u lah dep ioh lypa ia ka jingkylla bad ioh ruh ia ka naduh kato ka sngi kaba u la kner, kum u nongkhrong ba duh ja, ia ka San hajar tyngka.
