Shillong, Lber 20:
Ka West Jaiñtia Hills District Cricket Association ka la pynliem ïa ka East Khasi Hills Cricket Association da 9 wiket ha kaba sdang ïa ka lympung ïalehkai U-14 Girls Inter District Cricket T20 2023 ha ka Lah Sngi U Blei ha Nongpyndeng, West Khasi Hills.
Ha kawei pat ka jingïalehkai kaba long hapdeng ka Shillong Cricket Association bad ka West Khasi Hills District Cricket Association, la hap ban pynsangeh noh na ka daw ba shah pynthut ha ka mariang.
Ïa ka jingïakhun hapdeng ka WJH-EKH la hap ban pynhiar sha ki 12 over. Kumta ka EKH ka la kam trai shuwa ban tied nyngkong bad ka la kamai 59 run na bynta ban duh 3 wiket. Ka Sweetcemary Khongthiang ka dei kaba ïoh tied bun da kaba ïoh 16 run. Katba ki nongkawang bol ka WJH kiba la lah ban pynhap mar shi wiket ki long ka Sawakahi Syngkon (1/5), Linimandakini Ksoo (1/7) bad ka Sareeka Jat (1/25).
Haba wan shimti ïa ka pali ba ar, ka WJH ka la kynjoh sha ka thong da kaba ïoh 60 run bad shah pynhap 1 wiket ha ki 8.2 over. Kane ka la wan lyngba ka jingïalehkai bha ka Anastesia S. Shullai (not out) kaba la ïoh 29 run na ki 31 bol bad ïohpdiang ruh ïa ka nam ‘Player of the Match’. Katba ka Sawakahi Syngkon ka la lah ban pynhap wiket ïa ka Eliza Lyngdoh.
