Shillong, Lber 20:
Ka Ïingdorbar Thawaiñ ka Jylla ha ka Lah Sngi U Blei, ka la kynmaw burom ïa ki 16 ngut ki nongïalam ha ka saiñ pyrthei ha ka ri bad na kane ka Jylla kiba la long teng ki dkhot ka Ïingdorbar Thawaiñ ha ka ri baroh kawei.
Napdeng ki 16 ngut ki MLA bad ki MP kiba la khlad noh ha kylleng ki Jylla jong ka ri, ka ïingdorbar ka la kynmaw burom khamtam eh ïa u Myntri barim ka Jylla, u Nimarson Momin uba la long teng u Symbud Lamphang ka Ïingdorbar Thawaiñ.
U Nimarson Momin u la long u MLA ka UDP na Salmanpara konstitwensi bad u la shahjied ha ka sien kaba khatduh ha u snem 2008, ha kaba u la ïoh biang ban long u Myntri ka Sorkar Jylla.
Na ka liang u Myntri Rangbah, u Conrad K Sangma lem bad kiwei pat ki MLA kiba la ïakynduh bad treilang bad u Nimarson Momin ki la phah ka jingsngewlem sha ka ïing ka sem kaba la duh noh ïa u dkhot jong ka ïing bad pynpaw ruh ba ka dei ka jingduh ïa ka jylla bad ka ri.
Ka ïing baroh kawei ka pynpaw ruh ka jingsngewlem sha baroh ki bahaïing jong ki nongïalam kiba la khlad noh da kaba ïeng bad sngap jar ar minit kum ka dak ka jingburom bad jingsngewlem.
