Shillong, Lber 20:
Shiphew ngut ki khynnah ïalehkai Table Tennis ka Jylla ki la leit ïashim bynta ha ka lympung ïalehkai 84th Senior National & Inter State Table Tennis Championship 2023, kaba la sdang naduh ka Lah Sngi U Blei ha New Multipurpose Hall, M.A Stadium, Jammu.
Kine ki kynthup ïa san ngut ki shynrang, kita u Suranjit Dey, u Sandeep Kumar, u Zakir Hussain, u Banehkupar Sancley bad u Vibek Hajong, katba ha ka liang ki kynthei ki long ka Tanushree Dasgupta, ka Camelia Diengdoh, ka Diva Tang, ka Ilapynkmen Synrem bad ka Wanpyntngenlang Lyngdoh. Ïa kane ka kynhun la ïalam da u Coach ka Jylla u Bah Banshan Diengdoh.
Ha kane ka lympung ka ban kut haduh 27 tarik mynta u bnai, la wan ïashim bynta da ki nongïalehkai na ki jylla bapher bapher jong ka ri.
Haba phai sha ka jingïakhun jong ki shynrang hynne ka sngi, ka Meghalaya ka la shah rem ha ka Chandigarh da 0-3, katba ka jingïakhun ki kynthei kan sdang naduh ka Sngi Ba-ar.
