Shillong, Lber 20:
U Myntri Rangbah ka Jylla, u Conrad K Sangma u la pynpaw ka jingbym ïahap ban pyni ka jingpyrshah ha ka por ba u Lat ka Jylla, u Phagu Chauhan, u dang ai jingkren bad u la ong ba ka jingleh jong u dkhot ka Ïingdorbar Thawaiñ kan long ruh ka jingeh lada ha kiwei ki bynta ka ri India kin leh lang kumjuh bad pyni ka jingpyrshah lada ai jingkren da ka ktien kaba kim sngewthuh.
U Conrad u la ong ba u Lat haba u ai jingkren da ka ktien kaba u sngewsuk, kam mut ba um burom ne don da kawei pat ka jingsngew, hynrei kadei namarba ka don ka jingeh ha u, ha kaba ïa ka jingkren jong u Lat la pynkylla sha ka ktien phareng bad sam ruh ïa ka jingkren sha baroh ki dkhot ka ïingdorbar.
U la ong ba ha ka por ba la dep ruh, u Lat u la ai jingkren teng ha ka Hindi ha ïingdorbar, bad lada don ka jingsngew kaba dei ban pynpaw, la dei ban nym pat pyni ha ka por ba u Lat u dang ai jingkren.
“Ka long kaba donkam ban pynneh bad kyntiew ïa ka ktien lajong, bad ngi dei ruh ban kynmaw ba tang namarba ngi ieid ïa la kajong, ngim burom shuh ïa kiwei,” la ong u Conrad.
