Shillong, Lber 20:
Ka Myntri ka tnad ka koit ka khiah ka Jylla, ka Dr. M. Ampareen Lyngdoh ha ka Lah Sngi U Blei ka la ong ba ka Sorkar India ka dei ban phah da ki Lat kiba nang ban kren ïa ka ktien kaba ki nongshong shnong ka Jylla ki sngewthuh.
Ka Myntri ka la ong ïa katei haba kren sha ki lad pathai khubor hadien ka jingmih jyndat jong ki nongmihkhmat ka VPP napoh ïingdorbar kum ka dak ka jingpyrshah ïa ka jingkren ‘Hindi’ u Lat ka Jylla, u Phagu Chauhan.
“Ngi hap ban kynmaw ba ka long kaba donkam ban pynsngew halor ka jingdon jong ki nongshong shnong ka Jylla ki bym nang ban kren ne sngewthuh ‘Hindi’. Kumta ka long kaba donkam ban kdew ïa kane bad nga sngewkmen ba la pynsngew biang ïa ka sa shisien,” la ong ka Dr. Lyngdoh.
Ka la ong ruh ba ka long kaba donkam ban pyntikna ba ka Sorkar India ka tip ba ki nongshong shnong ka Jylla kim sngewthuh ïa ka ktien ‘Hindi’.
“Wat ma ngi ruh ngi don jingeh ban sngewthuh ïa ka ktien kaba la kren watla la pynbiang sha ngi ïa ka jingthoh. Kumta ka long kaba donkam ban ngin ïai ban ïa kane khnang ban pyntip bad kdew na ka por sha ka por ïa ka Sorkar India ba ngi dei ka jaidbynriew ka bym kren ïa ka ktien ‘Hindi’,” ka la ong.
Haba kylli, ka la ong ba tang namarba ka la don ha ka Sorkar kam mut ba ka liang pyrshah kam dei shuh ban pynsngew ïa katei ka mat, pynban dei ban sngewnguh ba la pynsngew biang ïa ka sa shisien wat hapdeng ka jingkylla liang – la ka long ha ka liang synshar ne pyrshah.
“Kam mut ba nga don ha ka Sorkar, nga hap ban ïeng. Ki don ki kyndon ba ngan hap bud. Hynrei nga sngewkmen ba la pynsngew biang ïa ka sa shisien. Ka Sorkar India ka dei ban pynleit jingmut ba lada long kaba lah, kan phah da ki Lat kiba kren ïa ka ktien kaba ki nongshong shnong ka Jylla ki sngewthuh. Ban kren tam nalor kata kan ym ïahap ha kane ka por,” la ong ka Myntri.
“Kumba ka long mynta, u Lat um nang ban kren da kawei pat ka jait ktien bad ka liang pyrshah ka la pynsngew ïa kane. Ngin ieh beit hangne, ngin ym kren tam eiei nalor kane,” ka la ong.
Haba jubab, ka la ong ba ka dei ka Myntri jong kane ka Sorkar, hynrei namar ka rukom pynïaid ïa ka synshar-khadar, kan ym lah ban kren eiei hynrei kam mut pat ba ïa katei ka mat ym dei ban pynsngew.
“La pynsngew ïa kane bad ka long kaba biang eh ban pyntip sha Delhi ba kin sngewbha pynleit jingmut ïa kane,” ka la ong.
Kum ban shu kdew hangne, ka Dr. Lyngdoh ha u snem 2018, kum ka MLA Congress (ha katei ka por) ka la mih noh napoh ïingdorbar thawaiñ kum ka dak ban pyrshah ïa u Lat barim, u Ganga Prasad uba la kren da ka ktien ‘Hindi’ hapoh ïingdorbar ha jaka ka ktien Phareng.
