Delhi, Lber:
Ka kynhun Top-G jong ka kynhun ialehkai online ka ri, ka la lah ban pynliem noh ia ka kynhun iakhun pyrshah ka Purr-ple na ka bynta ban paw shakhmat kum ka lahduh ha kaba sdang jong ka All-Female Counter Strike Global Offensive (CS: GO) Qualifiers ha ka National Esports Championships (NEsC) 2023.
Kumta katei ka jingjop ka long ruh ka jingpruid dak jong ka kam ialehkai ba seisoh jong ki thei ialehkai ka ri ha ka Esports. Nangta katei ka kynhun ialehkai ka la kylla long ruh ka kynhun ialehkai ba nyngkong ki kynthei jong ka kynhun CS:GO na ka ri India ban shah jied mynta sha ka jingiakhun ba khatduh ha ka lympung ialehkai kaba pawnam ha kylleng ka pyrthei ka World Esports Championships (WEC). Shuh shuh ruh katei ka kynhun ialehkai jong ki kynthei(Top-G) ka kynthup ia ki thei ialehkai ba paw bad ba tbit kata ka Swayambika Sachar (Sway)(Captain) , Shagufta Iqbal (xyaa), Nidhi Salekar (Stormyyy), Dilraj Kaur Matharu (COCO), Aastha Nangia (CrackShot) bad Priyanka Choudhary (ALEXAA) kum ki Substitute bad katei ka kynhun ka la lah ha ka ban pynliem noh ia katei ka kynhun iakhun pyrshah da 2-1. Ka jingjop ha katei ka lympung ialehkai bad ka jingshimbynta ka ri ha kum katei ka rynsan ialehkai bar-ri ka long ka jingurlong jong ka jingphohsniew na ka bynta baroh ki nongialehkai bad ki don ruh ia ka thong ban pynshisha sha ka pyrthei ia ka jingtbit ialehkai jong ki kynhun ialehkai ka ri khamtam eh katei ka kynhun ialehkai ki kynthei hadien katei ka jingjop.
Haba phai sha kata ka jingiakhun jong kitei ki ar kynhun ialehkai, ka Top-G ka lah ioh ban pyniaid ha ka jingiakhun ba nyngkong da 16 -10, ha shuwa ba ka Purr-ple kan iohlad ha ka ban wanphai sha ka jingiakhun da kaba rah ia ka jingjop ha ka jingiakhun kaba ar da 16-14. Ha ka jingiakhun kaba lai ka Top-G ka lah iohlad ban tam kput shakhmat da 19-15 ha ki por ialehkai ba lah palat na ka bynta ban ioh khur shalade ia ka jingjop.
Ka Esports Federation of India (ESFI) kaba pynlong ia ka NESC, mynta kan pynkhreh ruh ha ka ban pynlong ia ka jingialehkai paralok pyrshah ia ki kynhun ba tbit ka CS:GO na kiwei pat ki ri na ka bynta ka Top-G ha shuwa ka jingshimbynta jong ki ha ka WEC 2023; ka lympung ia kaba lah dep ban pynkhreh ka ban sa long ha Lasi, Romania. Kumta katei ka lympung ban wan ka kit ruh ia ka song pisa kaba haduh $500,000 (INR 4.12 crore) bad la kumba 130 tylli ki ri kin shimbynta bad ka bynta ba 15 jong ka WEC la pynkhreh kum kawei bynta ba heh jong ka lympung ialehkai ha ka pyrthei. Ka jingpyniakhun phainal ha kylleng ka pyrthei jong katei ka lympung ialehkai kaba paw kan long naduh ka 24 tarik u Nailar haduh ka 4 tarik u Nailur.
