Jeddah, Lber:
Ha ka lympung iakob pynmareh kali F1 jong ka Saudi Arabia Grand Prix, ka khubor ka iathuh ba ka kynhun Red Bull ka la nang iai bteng ban rah biang ia ka nam lahduh ha ka sien ba-ar jong katei ka lympung kaba pynlong ha Jeddah.
Ha kaba iadei bad katei ka jingkhur jingjop ka kynhun na ka tei ka lympung ialehkai, ka long ha kaba u rangialehkai ba pawkhmat ka tei ka kynhun u Sergio Perez; uba lah sdang ia ka jingiakhun da kaba ioh ieng ha u lain ba nyngkong napdeng kiwei pat, u la lah ban rah syndon ia ka trophy jingjop na ka lympung baroh kawei, katba u nongialehkai ba na kajuh ka kynhun ialehkai u Max Verstappen u lah iai pynher sted ia ka kali jong u shakhmat na ka jak aba 15 ba u ieng tad haduh ba un da lah ban pyndep ia ka jingiakhun baroh kawei da kaba wan ha ka kyrdan ba-ar.
Shuh shuh ruh u lahduh arsien ha ka lympung u Fernando Alonso uba lah sdang ia ka jing-iakhun na u ba nakhmat, hynrei uba lah ngat pat da ka san sekhon jingpynshitom ha ka por jong ka jingialehkai bad na katei ka jingshah kah lynti ka jong u, u lah iohlad ban pyndep ia ka jing-iakhun baroh kawei da kaba wan ha ka kyrdan balai na ka bynta ka kynhun ialehkai ka jong u ka Aston Martin bad ia kaba lah bud nadien jong u da ki arngut ki rang-ialehkai ka Mercedes; u George Russell bad Lewis Hamilton.
Ki arngut ki nongialehkai ka Red Bull ki lah long ki nongialehkai kiba lah bat ia ki ar kyrdan ba shakhmat ha kaba sdang jong ka aiom ialehkai mynta u snem ha ka Bahrain GP.
