Shillong, Lber 20:
U Vice-President ka National Rifle Association of India (NRAI) bad uba long ruh u President ka Shooting Association of Meghalaya (SAM) u Bah John F. Kharshiïng lem bad u General Secretary ka SAM u Bah Neil Sootinck ki la shah jied ban long kum ki dkhot hapoh ka Organizing Committee jong ka World Championships ka ban sdang naduh ka Sngi Ba-ar ha Bhopal, Madhya Pradesh.
“Kane ka long ka sien kaba nyngkong eh ba ngi la shah jied ban ïadon bynta ha kane ka lympung ban pynïaid da ka International Shooting Sports Federation (ISSF) ka ban sdang naduh 21 tarik bad kut haduh 27 tarik,” la pynpaw u Bah John haba ïakren bad u nongthoh khubor ha ka Lah Sngi U Blei.
Wat la ym pat don ki nongïalehkai na kane ka Jylla ki ban ïoh ïa ka lad ban mihkhmat ïa ka ri India, hynrei ka la long pat ka jingkmen ïa ki nongïalam ka SAM ba kin ïadon bynta ha katei ka lympung.”
Kitei baroh ar ngut ki nongïalam ka SAM ki la poi ha ka Lah Sngi U Blei ha kad liengsuiñ Bhopal ha kaba la pdiang sngewbha da ka Dr. S. Shrivastav, Assistant Director ka tnat ïalehkai ka sorkar Madhya Pradesh kynthup ïa ki heh ka NRAI bad ki heh nongïalam ka synjuk siat suloi na Madhya Pradesh.
Ha kane ka ISSF World Cup Rifle/Pistol ka ban long ha Bhopal la sakhi ïa ka jingwan ïashim bynta da 198 ngut ki nongïalehkai siat suloi na kylleng ka pyrthei kynthup ïa ki nongïasiat kiba kynsai kiba khur takma ha ka Olympic bad World Championship.
Ki ri kiba ïashim bynta ki la phah mar 37 ngut ki nongïasiat, ka ri India bad Ri China ki la phah bun ngut ki nongïashim bynta. Ka Denmark, Switzerland, USA, Korea, France bad Germany ki long ki ri kiba paw ha kaba ki nongïasiat jong kine ki ri ki khmih lynti ba kin lehkai bha.
Haduh mynta ki kynhun na palat 30 tylli ki ri ki la poi bad kiwei pat kin dang wan poi mynta ka miet bad ka jingplie pyrda ïa kane ka jingïakob kan long ha ka Sngi Ba-ar.
