Imphal, Lber:
Ki bor pahara jong ka jylla Manipur ki la pyntip ba ha ka miet jong ka sngi Saitjaiñ ba la dep ki la ïoh ban kurup ïa palat 50,000 tylli ki drok WY Tablet na ka shnong Lilong Haorou Hanggamthabi – ka shnong kaba jngai kumba 11 km na ka nongbah Imphal.
Kat kum ki jingpyllait kyrwoh jong ka tnat pulit ki la pyntip ba na katei ka jingjia ki la ïoh ruh ban kem ïa 3 ngut ki runar kynthup ïa uwei u pulit CRPF bad ïoh ruh ban kurup ïa 2 tylli ki Maruti car kynthup kawei kaba don ïa u ‘registration number’ jong ka jylla Meghalaya. Ki la pyntip ba ïa ka jingleit khynra ha katei ka sngi la pynlong hapoh ka jingkhmih jong u SP ka Imphal East District – Kshetrimayum Shivakanta.
Ki 3 ngut ki runar kiba la shah kem ha katei ka miet ki kynthup ïa u pulit CRPF u ba la tip kyrteng kum u Abdur Rahim (35 snem ka rta), u Md Itajurahamand (23) bad u Md Amir Khan (24), kiba dei baroh 2 ngut na ka thaiñ Lilong.
Kat kum ka jingïathuh jong ki bor pulit ki la pyntip ba ïa utei u droks la wan ban pynpoi sha ka jylla Manipur na Myanmar bad na ka liang ki runar ki thmu ban leit pynpoi ïa utei u drok sha ki thaiñ bad ki jylla bapher bapher jong ka Thaiñ Shatei Lam Mihngi jong ka ri.
Ïa ki 3 ngut ki runar kiba la shah kem ha katei ka sngi kynthup ïa u drok ba la ïoh kurup la leit ban aiti noh sha ki bor pulit ka Lilong PS na ka bynta ban pynlong ïa ki jingtohkit kiba dang sah. Ïa kitei ki 3 ngut kiba la shah kem la pynrung bad pynngat ruh hapoh ki kyndon jong ka NDPS Act.
