Imphal, Lber:
Kat kum ki jingïoh lum khubor na ka jylla Manipur la ïoh jingtip ba ka Sorkar Jylla ka la shim ïa ki lad ki lynti ban pynlong ïa ka jingkhmih thuh ïa ki kot ki sla jong ki nongshong shnong kiba shong ba sha ha ki 5 tylli ki distrik Rilum jong ka jylla na ka bynta ban ithuh bad ïa ki bar jylla kiba wan ban shong ban sah beaiñ ha Manipur. Ki 5 tylli ki distrik Rilum ki kynthup ïa ka thaiñ Chandel, Kamjong, Tengnoupal, Pherzawl bad Churachandpur district – kiba don ïa ka lynter khappud kaba haduh 398 km bad ka ri Myanmar.
Kat kum ki jingïoh lum jingtip la ïathuh ba ka sorkar jylla ka la shim ïa katei ka sienjam hadien ba ki seng bhalang bapher bapher ki la pynlong ïa ki jingïakhih ban dawa na ka sorkar ba ka dei ban pyntreikam noh ïa ka National Register of Citizens (NRC) ha Manipur bad kumjuh ruh hadien ba ki pulit ka jylla ki la ïoh ban kem da ki spah ngut ki bar jylla kiba la wan ban shong ban sah beaiñ ha Manipur.
Halor katei ka sienjam jong ka sorkar jylla, la ïathuh ba na ka liang jong u Myntri Rangbah ka jylla – N Biren Singh ha ka sngi Thohdieng ba la dep u la pynlong ruh ïa ka jingïalang khmih thuh ban khmih bniah halor ki sienjam kiba ka sorkar jylla kan shim na ka bynta ban pynlong ïa ka rynsan khmih thuh ïa ki kot ki sla jong ki nongshong shnong bar jylla kiba shong ba sah ha kitei ki 5 tylli ki distrik Rilum.
Ha ka jingpyllait kyrwoh jong u Myntri Rangbah u la pyntip ruh ba ka dei ka kamram jong ka sorkar jylla ban ïada ïa ki nongshong shnong trai muluk jong ka jylla, bad ka sorkar kan sa shim da ki sienjam kiba kyrpang na ka bynta ban khmih thuh ïa ki kot ki sla.
Kat kum ki jingïoh lum jingtip la ïathuh ba ha ki khyndiat sngi kiba la dep, ki la don bun tylli ki jingïalang bad ki jingïakhih kiba la pynlong da ki seng samla pule bad kumjuh ruh da ki seng bhalang ban dawa na ka sorkar ba ka dei ban pyntreikam noh ïa ka NRC.
La ïoh jingtip ruh ba ïa ka jingïalang ha ka sngi Thohdieng ba la dep la pynlong hadien ka jingshah kem jong ki 2 ngut ki nong Myanmar kiba la wan ban shong ban sah beaiñ ha ka shnong Phayeng Kharang Khunou, Imphal West district.
