Shillong, Lber 20:
Ka Dorbar Mang Tyngka kaba nyngkong eh jong ka Ïingdorbar Thawaiñ kaba khatwei ka Jylla ka la thnem ha ka sngi ba sdang hadien ba u Lat ka Jylla, u Phagu Chauhan u la ai jingkren da ka ktien Hindi. Kane ka la pynlong ïa u nongïalam ka Voice of the People Party (VPP), u Bah Ardent Miller Basaïawmoit ban ïeng bad pyrshah ha ka por ba u Lat u la sdang ban ai jingkren bad poi shaduh u pud ba ma u bad kiwei pat ki MLA ki la phet noh na ka ïingdorbar kum ka dak ka jingpyrshah bad kynnoh ruh ba kane ka jingleh jong u Lat ka dei kaba la pynïaid naduh Delhi.
Ka ju dei ka rukom ha kaba u Lat ka Jylla u dei ban ai jingkren ha Ïingdorbar Thawaiñ ka Jylla ha ka sngi ba sdang jong ka Dorbar Mang Tyngka.
Kane ka dei ka sien ba-ar ba u Lat ka Jylla un ai jingkren da ka Hindi, ha kaba ka sien banyngkong ka dei ha ka Dorbar Mang Tyngka ha u snem 2018, ha kaba u Lat ha kato ka por, u Ganga Prasad u la ai jingkren da ka Hindi.
Ka Kong Ampareen Lyngdoh kaba don sha ka Liang Pyrshah kum ka MLA jong ka Congress ha kato ka por, ka la pyrshah ïa ka jingkren u Lat da ka Hindi, tangba ka pynpaw ïa kata, hadien ba u Lat u la dep ban ai jingkren.
Ka Kong Ampareen ka la kren ruh da ka ktien Khasi ha ïingdorbar ha kawei pat ka sngi, da kaba pynkhreh ruh ïa ka jingkren kaba la dep pynkylla sha ka ktien Phareng da kaba bud ïa ki kyndon kumba la bthah da u Lamphang ha kato ka por, u Dr Donkupar Roy.
U Bah Ardent u la ïeng ban pyrshah ïa ka jingkren u Lat tang mar ïa sdang ïaid ka jingkren, bad u la kdew ba ka Jylla Meghalaya kam dei kata ka Jylla ba ki nongshong shnong ki pyndonkam ïa ka ktien Hindi ban ïakren.
U Bah Ardent u la ong ba ym dei ban ailad ïa kane bad u pyrta artad ïa ki kyntien pynrem da kaba ong, “Down Down, we condemn the Governor.”
Na ka liang u Lamphang ka ïingdorbar u Thomas A Sangma, u la ïeng ban pynshai ba wat la u Lat u la ai jingkren da ka Hindi namar um lah da ka ktien Phareng, hynrei ïa ka jingkren jong u Lat la dep pynkylla sha ka Phareng bad la sam ruh ïa ka kot jingkren jong u sha baroh ki dkhot ka ïingdorbar.
Hynrei u Bah Ardent u la bteng ban pynpaw biang ka jingbym ïahap jong u bad u la pynpaw ba wat ki nongïalam ha ka por ba ïakhih ban dawa Jylla lajong, ka dei na ka daw jong ka ktien.
Kumta u la ïeng beit ha ka nongrim ban pyrshah ha kaba u Myntri Rangbah, u Conrad K Sangma ruh u la ong ba ka jingleh u dkhot ka ïingdorbar kam ïahap satia khamtam ban pyni ha ka por ba u Lat u dang ai jingkren, namarba ka jingkren jong u Lat ha ka ktien Phareng ka la don lypa bad sam sha baroh ki dkhot ka ïingdorbar.
Kumta haba u Lat u la bteng biang ban ai jingkren, u Bah Ardent u la ïeng na jaka shong bad phet noh na ïingdorbar lem bad ki MLA jong ka VPP kum ka dak ka jingpyrshah.
U la ong ba kane ka long kum ka jingibeiñ, da kaba ong artad ba kito ki bym don jingsngew ba ka dei ka jingshah ibeiñ, ka bha ba ki shong ha ïingdorbar. U la ong ruh ba ym lah ban pdiang ïa ka jingpynbor ban kren da ka ktien Hindi ha kane ka Jylla.
U Bah Ardent u la kynnoh ruh ba kane baroh ka jingleh ka dei kaba la wan bad pynïaid naduh Delhi, ha kaba ka VPP kam pdiang namar ka Meghalaya kam dei kata ka Jylla ba ki paidbah ki kren da ka ktien Hindi.
Dei tang ha ka por ba shondur lang ki MLA bad u Lat, u Bah Ardent bad ki MLA ka VPP ki la wan mih sha phyllaw ka ïingdorbar ban ïa shondur lang bad u Lat.
Ha kawei pat ka liang, haba kylli shabar jong ka ïingdorbar, u Bah Ardent u la ong ba haba ïadei bad ka jingïatai halor ka jingkren jong u Lat, un ïashimbynta ban ïatai da ka ktien Phareng
Ka jingïatai halor ka jingkren jong u Lat, kan long ha ka sngi ba-ar, ha kaba u Myntri Rangbah u Conrad K Sangma un sa ai jubab hadien ba ki dkhot ka ïingdorbar ki la dep ban ïatai.
