Shillong, Lber 20:
U dkhot ba rangbah tam eh jong ka Ïingdorbar Thawaiñ kaba khatwei ka Jylla uba dei u MLA ka Resubelpara konstitwensi, u Timothy D Shira u la shahjied kum u Symbud Lamphang ka Ïingdorbar khlem kano-kano ka jingïakhun.
Ïa ka jingshahjied u Timothy kum u Symbud Lamphang ka Ïingdorbar Thawaiñ la pynbna da u Lamphang ka Ïingdorbar Thawaiñ, u Thomas A Sangma hadien ba ym don kiwei pat ki kyrtong, lait na u Timothy uba la thep kyrteng ban ïakhun ïa ka ilekshon ban shahjied kum u Symbud Lamphang.
U Timothy uba la kynjoh 77 snem ka rta, u dei u MLA uba la shahjied la bunsien na Resubelpara konstitwensi ban long u dkhot ka Ïingdorbar Thawaiñ ka Jylla.
Hadien ba u la shahjied kum u Symbud Lamphang, na ka liang ki MLA naduh u Myntri Rangbah u Conrad K Sangma lem bad kiwei kiwei ki MLA ki la ai ka jingkren khublei ïaroh ïa u Timothy uba la poi biang sha kane ka kyrdan ha ka sien ba-ar.
Khyndiat haba phai sha ka jingïaid lynti jong u Timothy ha ka saiñ pyrthei, une u nongïalam ba la rim ha ka saiñ pyrthei, u dei uwei na ki nongïalam ba ha ka jingïaid lynti jong u, u la mad ïa ka jingjop bad ka jingrem naduh ba u la sdang ban ïakhun ïa ka ilekshon ha u snem 1978.
U Timothy u la long u MLA ka Resubelpara konstitwensi mynta la bun phew snem bad un sa dap 78 snem ha u Nailur mynta u snem.
Une u nongïalam u la rung sha ka jylli saiñ hima sima naduh u snem 1978 bad u khlem sangeh ban ïakhun ïa ka ilekshon. U dei u briew uba ieid bad mon bha ban don bad ki seng riewlum kum ka APHLC, HPU bad UDP.
Wat hapdeng ka jingbym shahjied ha bun tylli ki ilekshon naduh u snem 1978, u Timothy u khlem man thait ne kynran dien ban ïakhun ïa ka ilekshon. Kumba ong ka ktien, ‘ka jingïaishah ka kthang, hynrei u soh jong ka u thiang,’ u Timothy ruh da ka jingïaishah, u la shahjied nyngkong eh kum u MLA ka Resubelpara konstitwensi ha ka ilekshon MLA ha u snem 2003 ha kaba u la pynliem ïa u Myntri Rangbah barim ka Jylla u Salseng C Marak, uba long ruh uwei na ki nongïalam ba paw na kane ka Jylla uba ju don bad ka Congress.
Ha u snem 2008, u Timothy u la jop biang na Resubelpara, ha kaba u la ïoh ruh ban bat ïa ka kyrdan kum u Symbud Myntri Rangbah ka Jylla ha ka por jong ka Sorkar MPA kaba ïalam da ka UDP naduh u Lber, 2008 haduh Lber, 2009.
Ha u snem 2013, u Timothy u la rem biang ha u Salseng na Resubelpara, hynrei ha ka ilekshon ha u snem 2018 bad 2023, u la shahjied biang kum u MLA.
Kum u dkhot uba la rangbah tam, u Timothy u la shahthung kum u Protem Speaker la arsien ha u snem 2018 bad mynta u snem 2023, ha kaba u la pynsmai ruh ïa ki dkhot ka ïingdorbar Thawaiñ kiba shahjied thymmai.
U Timothy u la pynpaw ka jingsngewnuh ïa baroh ki dkhot ka ïingdorbar Thawaiñ kiba la ai ka jingshaniah ïa u ban bteng biang kum u Symbud Lamphang bad u ngeit skhem ba un ïoh ka jingïatreilang na ka ïing baroh kawei haba ka dei ka pali jong u ban pynïaid ïa ka dorbar kum u Symbud Lamphang.
U Timothy u dei sa tang ma u uba la ïakhun ïa ka ilekshon naduh u snem 1978, bad u dang shahjied biang haduh mynta kum u dkhot ka ïingdorbar Thawaiñ kaba khatwei jong ka Jylla.
