Shillong, Lber 20:
Ka Sorkar Jylla ha ka sngi Nyngkong ka la pynmih ïa ka hukum pynkynriah kam ïa ki ophisar IAS kiba bat ïa ka kyrdan Deputy Commissioner ha kaba la thung ïa ka Kong Rosetta Mary Kurbah kum ka Deputy Commissioner ba thymmai jong ka East Khasi Hills District.
Ka Kong RM Kurbah ka la bat teng kum ka Deputy Commissioner ka Ri-Bhoi bad East Jaiñtia Hills District, mynta ka kynti kan sa shimti pat kum ka DC ba thymmai jong ka East Khasi Hills na u SC Sadhu uba la shah pynkynriah kum u Director ka tnat Community & Rural Development ka Jylla.
Katkum ka jingpynbna, u Sadhu un trei ruh kum u Secretary ka tnat Community & Rural Development bad ka tnat Water Resources.
U Jagdish Chelani, IAS (RR: 2018) uba dei u Deputy Commissioner barim ka East Garo Hills District, Williamnagar u la shah pynkynriah ban shimti ïa ka shuki Deputy Commissioner ka West Garo Hills District, Tura.
Katba u Swapnil Tembe u la shah pynkynriah kum u Joint Secretary ka tnat Education bad Director ka School Education & Literacy bad Special Project Director, SSA.
U Vibhor Agarwal, IAS (RR: 2019) u la shah thung kum u Deputy Commissioner ka East Garo Hills District, Williamnagar.
U Bah G Kharmawphlang, IAS (SCS: 2014), Deputy Commissioner ka South West Garo Hills District, Ampati u la shah pynkynriah kum u Deputy Commissioner ka Eastern West Khasi Hills District, Mairang bad ïa u Bah W Nongsiej, IAS (SCS: 2011), Deputy Commissioner, Eastern West Khasi Hills District, Mairang la pynkynriah kum u Secretary ka tnat Prisons & Correctional Services.
