Aizawl, Lber:
Ka ïing kashari jong ka nongbah Aizawl ha ka Lah Sngi U Blei mynta ka taiew ka la pynmih da ka rai ban set patok haduh 5 snem ïa ki 2 ngut ki heh sorkar barim jong ka tnat Excise & Narcotics bad jong ka tnat Finance na ka daw jong ka jingdonkti jong ki ha kawei ka kam bam sap kaba la jia kumba 5 snem eiei mynshwa.
Ka ïing kashari ba kyrpang (Prevention of Corruption Act) ka la daiñ kuna ruh haduh T.1.80 klur bad T.3 lak pyrshah ïa kitei ki 2 ngut ki heh sorkar kiba rim kiba la leit ban ïalam set patok ha Central Jail, Aizawl.
Kat kum ki jingïoh lum khubor la ïathuh ba na ka liang u nongïasaid ka HTC – Lalrinchhana u la pynmih ïa ka rai ban pynrem ïa u Rongura (superintendent barim ka Tnat Excise & Narcotics) na ka daw jong ka jingdonkti jong u ban pyndonkam bakla ïa ka pisa kaba la kot haduh T.1.73 klur. La ïoh jingtip ba u tei u heh sorkar ha ka por ba u dang don ha ka kam hapdeng u snem 2010 bad 2017 u la donkti ban bthah ïa ki nongtrei cashier ba kin shna ruh ïa haduh 106 tylli ki bill na ka bynta ka tulop kaba la kot shaduh ka T. 1.81 klur.
Na ka liang ka ïing kashari ka la bthah ïa u Rongura ba un siew ïa ka kuna kaba la kot shaduh ka T.1.8 klur bad lada um lah ban siew ïa katei, ïa ka jingshah set phatok yn pynjlan sha ka 90 snem.
Ha kawei pat ka jingjia, na ka liang ka ïing kashari ka la tian bishar bad pynmih ïa ka rai ban set phatok 4 snem ïa u Suakngura (Assistant Account Officer barim jong ka Serchhip Treasury) na ka daw jong ka jingdonkti jong u ban shim pisa beaiñ na u Rongura. Ka ïing kashari ka la daiñ kuna ruh haduh T.3 lak pyrshah ïa u Suakngura.
Kat kum ki jingïoh lum jingtip la ïathuh ba ka ïing kashari ka la tian bishar ïa kitei ki 2 ngut ha ka 17 tarik mynta u bnai kat kum ki kyndon hapoh ka Section 420 (cheating) 477A (falsification of accounts) jong ka IPC bad hapoh ka section 13(2) (criminal misconduct) jong ka Prevention of Corruption Act, 1988.
