Shillong, Lber 21:
Ka Hynñiewtrep Youths’ Council (HYC) lyngba u General Secretary, Bah Roykupar Synrem, u la ong ba ki mat kiba ka seng ka buh hakhmat duh ki dei ka Inner Line Permit (ILP) bad ka jingpynrung ïa ka ktien Khasi hapoh ka Khyrnit ba Phra jong ka riti synshar ka ri.
Haba kren sha ki lad pathai khubor ha ka Sngi Ba-ar, u Bah Roy u la ong ba ka seng ka ïeng ban ïada ïa ka jingrung jong kiwei pat ki jaidbynriew hapoh ka jylla, bad kawei pat ka dei halor ka jingpynneh pynsah ïa ka ktien ka thylliej namar kum ka jaidbynriew ka thrang ban ithuh noh ïa ka ktien Khasi ha ka khyrnit kaba phra jong ka riti synshar ka ri.
“Ka ILP ka dei ka mat kaba donkam eh ïa ngi haduh katta katta kum ka jaidbynriew ban ïada na ka jingrung kyrthlep jong ki mynder ri hapoh kane ka ri jong ngi bad ka ktien Khasi ka dei kaei kaei kaba ngi thrang kum ka jaidbynriew ban ithuh ha ka khyrnit kaba phra,” la ong u Bah Roy.
U la ong ba lyngba ka jingpynrung ïa ka ktien Khasi hapoh ka khyrnit kaba phra, kan plie ka lad ka lynti ruh ïa ki khun samla ha ka ïoh kam ïoh jam.
Ka seng lyngba u General Secretary ka la ong ruh ba kan ïai buddien ïa kine ki mat kiba la kular da bun tylli ki seng ha ka por ilekshon bad ka seng kan sa shim ruh ïa ki sienjam ban leit pynkynmaw ïa ka sorkar thymmai ha ki sngi ban wan halor ki mat kiba dang sahkut haduh mynta.
“Ngi la ïohi ba bun na ki seng kiba don hapoh ka sorkar kaba mynta, ki la shim ïa ka ILP kum kawei na ki mat ha kaba ki leit sha ki paidbah ban pan ïa ka jingkyrshan bad kumjuh ïa ka jingpynrung ïa ka ktien Khasi, ki la buh hakhmat eh ban pynurlong ïa kine ka jingangnud,” la ong u Bah Roy.
