Shillong, Lber 21:
U Symbud Myntri Rangbah ka Jylla, Bah Prestone Tynsong uba khmih ruh ïa ka tnat PWD (R) ha ka Sngi Ba-ar u la pyntip ba ka jinglong jingman ka surok na Umshyrpi sha Bañiun, ka dang don hapdeng ka jingkhot ‘tender’ thymmai.
Kane ka bynta ka surok na Umshyrpi sha Bañiun ka dei kaba hap hapoh ka package-I jong ka Shillong-Dawki road project.
U Bah Prestone u la pyntip ïa kane haba jubab ïa ka jingkylli ba la wanrah da u MLA ka Congress na Mylliem u Bah Ronnie V Lyngdoh. Nangta u la pyntip ruh ba ka kompeni kaba shimti ban pyntrei ïa kane ka surok ba la ai da ka Ministry ka la iehnoh shiteng ïa ka kam.
Shuh shuh u Symbud Myntri Rangbah u la pyntip ba ka kompeni kaba ka Ministry ka la aiti ïa ka kam hapoh ka National Highways and Infrastructure Development Corporation Limited (NHIDCL) ka la ieh noh shiteng ïa ka jingtrei bad “Nga kynmaw ba ha u bnai Lber-Ïaïong 2022, nga la leit hi da lade sha Delhi bad ïakynduh ïa u MD bad Secretary jong ka Ministry ba dei khmih ban ïakren bad pynpaw ïa kine ki mat ha kaba ki la rai ba dei ban sdang noh ban phah biang ïa ka tender”.
U Bah Prestone u la pyntip ba hadien ba la pynïaid shakhmat ïa ka kam, tang kawei ka kompeni ka la ïashimbynta, kaba la pynlong ïa ka Ministry ban khot thymmai bad nga tikna ba hapoh u ’nai Ïaïong, kane ka kam kan dep noh bad ka jingpyntrei ïa ka surok kan sdang biang.
U la pyntip ruh ba ka jingpynkynriah ïa ki tiar ki tar ka dang ïaid shakhmat bad ong “Ngi la shong jingïalang ha ka kyrdan jong nga bad jong u Chief Secretary ha kaba ngi la peitngor namar ïa ka jingpynkynriah ïa ki tum ki tam hap ban pyndep noh kham kloi kat kaba lah shuwa ka 15 tarik Ïaïong.
Haba ïadei bad ka package-5 bad package-3 jong ka project, u Symbud Myntri Rangbah u la ong, “Ïa ka package-5, ka kam ban khot ‘tender’ biang ka la don ha ka khep ba khatduh hadien ba ka kompeni ka la iehnoh ïa ka kam. Katba ïa ka package-3 pat, kaba dei ka by-pass jong ka Pynursla, ka NHIDCL ka dang pynkhreh ïa ka Detailed Project Report (DPR) hadien ba ki trai jaka bad ki Khlieh Nongsynshar ki la rai ban nym pyrshah satia ïa ka by-pass”.
U Bah Ronnie uba la ïeng ban buh jingkylli bynrap biang, haba pynpaw ka jingsngewkhia, u la ong ba kane ka kam kan dang shim por. Kumta u la buh ka jingkyrpad hakhmat ka Sorkar ba kan kham pynsted noh ïa ka jingpyntrei ïa ka surok Western Bypass khnang ba kan kham pynduna ïa ka jingsahkut dheng kali.
U Bah Ronnie u la ong, ka jingdheng kali ha shilynter ka surok kaba la ktah jur ia ki nongshong shnong ka Upper Shillong bad kiwei ki bynta jong ka Jylla. “Haba nga mih na ïing ban wan sha ïingdorbar, ka la shim por haduh shi kynta ïa nga, namar ka jingjur ka dheng kali, bad ka jingdheng kali ka la pynsohsat ruh ïa ki khynnah pule kiba hap ban shong dheng kali da ki kynta ha surok,” la ong u Bah Ronnie bad bynrap ba la donkam ïa ka sorkar ban kham pynkloi noh ïa ka surok Western Bypass.
Haba jubab halor kane, u Bah Prestone u la ong ba ka kam jong ka Western Bypass ka la poi ha u pud ban ïathied jaka bad ong, “Nga tikna ba lada ki kam ki ïaid beit hapoh ka 3 bnai, ngin sa lah ban aiti ïa ka jaka sha ka kompeni ba kan lah sdang noh ïa ka kam”.
