Shillong, Lber 21:
U MLA ka Voice of the People Party (VPP) na North Shillong, u Bah Adelbert Nongrum, u la ong ba dei ban ujor ejahar ne ai da ka mukotduma pyrshah ïa u Myntri Rangbahduh ka Ri u Narendra Modi bad ïa u Myntri ka tnat Kam Pohïing ka Sorkar Kmie u Amit Shah halor ka jingkynnoh ba ka Meghalaya ka dei ka jylla kaba bamsap tam.
U Bah Adelbert u la pynpaw ïa kane haba wanrah ïa ka jingïatai kaba lyngkot ne ka ‘Short Duration Discussion’ hapoh ka ïingdorbar mang tyngka ha ka Sngi Ba-ar. Nangta u la ong ba ka sorkar jylla ka dei ban ujor ejahar mynraiñ khmat pyrshah ïa u Narendra Modi bad u Amit Shah halor ka jingkynthoh jong ki ïa ka jylla Meghalaya kum ka jylla ba bamsap tam kaba ki la kren ha ka por ba ki wan sha ka jylla ha u ’nai Rymphang, shi sngi ne ar sngi shwa ka ilekshon.
U Bah Adelbert u la ong ba lada ki jingkynnoh bamsap pyrshah ïa ka sorkar ka long ka bym shisha, kumta kane ka sorkar ba mynta ka dei ban ai da ka jubab kaba tyngeh halor ki jingpynthohbria jong kitei ki nongïalam ka Ri lane da kaba ujor da ka ejahar mynraiñ khmat pyrshah ïa ki naba ki la kren ïa kaei-kaei kaba ktah ïa ka nam bad ka kyrteng jong ka jylla.
Une u MLA ka VPP na North Shillong u la ong ruh ba lada ka sorkar ba mynta ka pulom ban ai ïa ka jubab ba tyngeh pyrshah ïa ka jingkynthoh u Myntri Rangbahduh ka ri kaba u la kren ha ka 24 tarik Rymphang bad ki jingkren jong u Myntri ka Sorkar Pdeng kaba u la kren ha ka 16 bad 17 tarik Rymphang, kan pynlong ïa ki paidbah ka jylla ba kin shim ba ki jingkynnoh halor ka bamsap ka long kaba shisha.
Katba na ka liang u Dr. Mukul Sangma, uba dei u MLA ka Trinamool Congress (TMC) na Songsak u la ong ba ka ïingdorbar thawaiñ ka la dei ban wanrah da ka rai (resolution) na ka sorkar, ban kyntu ïa ka sorkar India ban ai ïa ki sakhi sabut halor ki kam bamsap hapoh ka jylla, ïa kiba la kam bad kynthoh da u Myntri Rangbahduh ka Ri bad u Myntri ka tnat Kam Pohïing ka Ri.
Haba ïashim bynta ha kane ka jingïatai kaba lyngkot, u Dr. Mukul u la ong, “Lada don kino-kino ki dak ba kaba kum kata ka don, ai ba ka sorkar India kan leh ïa kaba donkam ban tohkit halor kita ki kam bamsap khnang ba ngi, lada ngi khuid, ngin long kiba lait na ka jingpynrem bad ka jylla ruh kan laitluid na kata ka dak sniew.”
U Dr. Mukul u la ong, ba ka bamsap ka dei kaba kham shyrkhei ban ïa ki kam lehnoh namar ym tang ba ka pyndkoh, hynrei ka pynngam ruh ïa ka jylla. “Nga kyntu ïa ka sorkar hapoh ka jingïalam u Myntri Rangbah, namar ka long kaba dei ba kane ka ïingdorbar thawaiñ kan pdiang ïa ka rai (resolution) na ka sorkar,” la ong u Dr. Mukul.
