New Delhi, Lber:
Ka long ka jingsngew sarong kaba khraw na ka bynta kawei na ki thei ialehkai Hockey ka ri kaba pawnam bha ha ka kam ialehkai ka jong ka, ka Rani Rampal ha kaba ka lah kylla long ka thei ialehkai ba nyngkong ban ioh ia kawei ka madan ialehkai ha ka kyrteng jong ka ha Rae Bareli.
Kumta ka MCF Rae Bareli mynta ka sien ka lah pynthymmai biang ia ka kyrteng jong ka madan ialehkai Hockey ka jong ka kum ka ‘Rani’s Girls Hockey Turf’. Ha kata ka sngi ba lah pynbna ia katei ka kyrteng, la sakhi ruh ba ka Rani ka lah ioh ban iakren bad iamir jingmut bad ki nongialehkai bad kaba lah ioh ruh ban plie ia katei ka madan ialehkai ha ryngkat ka jingiadonlang bad kiwei pat ki dkhot. Ha ka jingai da ka kyrteng jong ka ha kata ka madan ialehkai, na ka liang jong katei ka nongialehkai ka pynpaw ia ka jingsngewkmen bad ka jingsngewnguh kaba khraw ia ka MCF Raebareli kaba lah pynthymmai ia ka kyrteng jong katei ka madan ialehkai sha ka “Rani’s Girls Hockey Turf” kum ka jingburom ia ka jingnohsynniang jong katei ka nongialehkai ha kam ialehkai Hockey ka jong ka. Ka pynpaw ruh ia ka jingsngew sarong bad ka jingsngewburom na ka bynta jong ka naba ka long ka thei ialehkai kaba nyngkong jong ka ri ban ioh ia ka madan ialehkai ha ka kyrteng jong ka. Kum ban shu pynkynmaw hangne ka long ba ka Rani ka lah wanphai biang sha ka kynhun ialehkai ka ri ha ka por ba ka kynhun ka leit ban iakhun sha South Africa ha kaba ka tei ka nongialehkai ka lah shah kynthuplang ha ka thup kyrteng ba 22 ngut ki nongialehkai. Ka Rani ka lah wanphai biang sha ka kynhun hadien ba ka lah dep ban ialehkai khatduh pyrshah ia ka Belgium ha ka FIH Women’s Hockey Pro League 2021-22, ha kaba katei ka nongialehkai ka lah rah ia ki 250 Cap na ka bynta ka ri.
