Guwahati, Lber:
U Myntri Rangbah jong ka jylla Assam, u Himanta Biswa Sarma ha ka Lah Sngi U Blei mynta ka taiew u la pyntip ba ka sorkar jylla ka don ïa ka thong ban rat dyngkhong ïa ki kam shong kurim beaiñ ïa ki khynnah rit ha ka jylla Assam hapoh u snem 2026. U Myntri Rangbah u la pyntip ïa katei ha a por ba u la ai jingkren ha Ïing Dorbar Thaw Aiñ ha ka Lah Sngi U Blei mynta ka taiew.
Haba ai jubab hadien ka jingshah kylli jingkylli ha u MLA jong ka seng Congress – Kamalakhya Dey Purkayastha, na ka liang u Myntri Rangbah ka jylla u la pyntip ba ka sorkar jylla ka la shim ïa ki lad ki lynti kiba kyrpang eh na ka bynta ban rat dyngkhong ïa ki kam pynshong kurim beaiñ ïa ki khynnah rit. U la pyntip suh shuh ba ïa ki kam pynshong kurim beaiñ ïa ki khynnah rit ha ka jylla Assam dei ban pynsangeh hashwa ban kut u snem 2026. U la ïathuh ba na ka bynta ban pynsangeh ïa katei ka kam beaiñ, ka sorkar jylla ha ki khyndiat sngi ki ban sa wan kan sa shim ïa ki rai kiba kyrpang na ka bynta katei ka kam.
Na ka liang u Myntri Rangbah u la pyntip shuh shuh ba ka sorkar jylla ka la pynkhreh ïa ka mang tyngkat kaba haduh T.200 klur na ka bynta ban ïakhun pyrshah ïa ki kam pynshong kurim beaiñ ïa ki khynnah rit. U la pyntip ruh ba ka sorkar jylla kan sa pynsdang da kawei ka rynsan kaba kyrpang ban rat dyngkhong ïa katei ka kam beaiñ.
U la ïathuh ba na ka liang ka sorkar jylla kan pynsdang ïa ka rynsan ban pyrshah ïa ki kam pynshong kurim beaiñ ïa ki khynnah rit, bad ka sorkar ha ka shisien shi bnai ne ar bnai kan leit ban kem ïa ki briew kiba donkti ha kitei ki kam beaiñ. U la ïathuh ruh ba tad haduh kane ka kynti kaba mynta ki bor pulit jong ka jylla ki la lah ban pynrung ïa ki ‘charge sheet’ ha kumba 900 tylli ki mokotduma, bad na ka liang ki bor pulit ki la pynsdang ruh ïa ki kam tohkit kat kum ki kyndon jong ka aiñ.
U la ïathuh shuh shuh ba na ka liang ka sorkar jylla ka la shim ïa ki sienjam kiba kyrpang ban pynlong ïa ki rynsan pynsngewthuh paidbah halor ki mat kiba ïadei bad ki kam pynshong kurim beaiñ ïa ki khynnah rit.
U Myntri Rangbah u la pyntip shuh shuh ba na ka liang ka sorkar jylla kan shim ruh da ki sienjam kiba janai ban pynbiang ïa ki lad jingïarap na ka bynta ki lanot kiba la ngat ha kitei ki kam beaiñ. U la pyntip ba na ka liang ka sorkar jylla kan pynbiang ïa ki ‘scholarship’, ka jingshong skul khlem da donkam ban siew pisa, pynbiang khaw ei bad kiwei kiwei ki lad jingïarap.
