Shillong, Lber 21:
Ka West Jaiñtia Hills District Cricket Association ka la pynliem noh ïa ka East Jaiñtia Hills DCA da shi inning bad 19 run ha ka lympung ïalehkai U-15 Inter District Cricket Tournament 2023 Zone 1 ha ka sngi Ba-ar ha madan Umbuda, Ri-Bhoi.
Ha ka Zone 2 kaba la long ha Williamnagar, ka jingïakhun hapdeng ka South Garo Hills DCA bad ka West Khasi HIlls DCA ki la kut ha ka jingïakhaid, hynrei ka South Garo Hills ka la kamai dor-thong (point) hadien ba ka la tam ha kaba nyngkong.
Hynnin ka sngi, ka EJH ka la kamai tang 20 run ha ka inning kaba nyngkong bad ka WJH ka la ïoh 12/1. U Eshan Siangshai (Player of the Match) bad u Maremdorkini Sutnga ki la lah ban kynjoh sha ki 79 run hashwa ban shah pynhap ïa ka wiket ba ar. Kumta u Sutnga u la shah pynhap hadien ba u la ïoh 36 run bad ka WJH ka la lah ban kamai 120 run bad shah pynkhyllem 6 wiket bad u Siangshai (Player of the Match) u la long u nongtied uba khlem shah pynhap wiket bad ban kamai 52 run. U Siyon Sangma u la long u nongpynhap wiket uba kynsai da kaba ïoh khur 4 wiket.
Ka EJH ka la lah ban kynjoh sha ki 100 run na ka bynta ban pynlong ïa ka liang pyrshah ban tied biang bad ka la kamai 81 run na bynta ban shah pynhap baroh ki nongtied. U Rohit Panday u la long u nongtied uba la ïoh bun da kaba kamai 30 run, katba u Namewanki Pakyntein u la lah ban khur 5 wiket bad u Redolent Shadap u la ïoh 2 wiket.
Ha kawei pat ka jingïakhun, ka SGH ka la shah pynkhyllem baroh ki nongtied na ka bynta ban kamai 184 run hynnin ka sngi. Ka WKH ka la lah ban kamai tang 140 run bad shah pynkhyllem baroh ki nongtied. U Dabetbhalang Kharjana (59) bad u Andrew Starfill Rani (47) ki la lah ban noh synñiang na ka bynta ka WKH. Ki nongkawang bol kiba la lah ban pynhap wiket ki long u Jyeipara A Sangma (3/18) bad u Christwar S. Marak (3/29).
Watla ka la tam da 44, ka SGH ha ka inning ba ar ka la lah ban kynjoh sha ki 239 run bad shah pynhap 8 wiket ha ki 31 over. Kane ka la wan urlong lyngba u Christwar uba la lah ban kamai ïa ka spah run kaba 136 run na ki 96 bol. Une u nongtied uba la ïoh ban khyrwit 15 tylli ki ‘four’ bad 10 tylli ki ‘six’. Katba u Arwanmeki Lyngkhoi u la lah ban khur 5 wiket.
Tang 15 wiket ba ka WKH kan kynjoh sha ka thong, hynrei ka la lah ban pynkut da kaba kamai 47/1 bad kane ka mut ba ki la kut ha ka jingïakhaid.
