Shillong, Lber 21:
U rangialehkai siatkhnam ka Jylla u Devraj Mohapatra u la khur ïa ka takma rnong ha ka 2nd NTPC National Ranking Archery Tournament (NRAT)-2023 ba la pynïaid da ka Archery Association of Meghalaya (AAM) ha ryngkat ka jingïatrei lang bad ka Archery Association of India (AAI).
Une u rangïalehkai uba la mihkhmat ïa ka Jylla u la khur ïa katei ka takma ha ka jingïakob siat kaba 60 metre jong ka recurve division ha ka Sub-Junior Boys kaba long ha ka Sngi Ba-ar ha Sports Authority of India, Training Center, Shillong.
Ïa ka takma ksiar la khur da u Shivam Rajendra Chikhale na Maharashtra bad ïa ka takma rupa la khur da u Modit na Haryana.
Ha ka liang ki kynthei jong kane kajuh ka kyrdan ïakob, ka Anisha Das na Assam ka la khur ïa ka takma ksiar, ka Laiphrakpam Rabina Dev na Manipur ka la khur ïa ka takma rupa bad ïa ka takma rnong la khur da ka Mainsha Choudhury na Rajasthan.
Ha ka jingïakob Sub-Junior Compound Division (50 metre) jong ki shynrang la khur jingjop da u Raj Chattar na Jharkhand, katba ïa ka takma rupa la khur da u Abhi Khatri na Delhi bad ïa ka takma rnong la khur da u Elangbam Lamnganba Singh na Manipur.
Ha ka liang ki kynthei jong kane kajuh ka kyrdan ïakob la khur takma da ki nongïalehkai na Delhi. Kine ki kynthup ïa ka Ekta Rani kaba la khur ïa ka takma ksiar, ka Tanishka Bhatia kaba la khur ïa ka takma rupa bad ïa ka takma rnong la khur da ka Kumud Saini.
