Shillong, Lber 21:
U MLA ka VPP na Nongkrem, u Bah Ardent Miller Basaïawmoit, ha ka Sngi Ba-Ar u la buh jingkylli halor kata ka jingtohkit CBI ha kaba ïadei bad ka jingjia ha Mukroh ha u snem ba la dep ha kaba wat u Myntri Korbar Ri, u Amit Shah, u la mynjur ban phah tohkit ha kane ka kynhun.
Haba ïashim bynta ha ka jingïatai halor ka jingkren jong u Lat ha ka Dorbar Mang Tyngka, u Bah Ardent u la ong ba haduh mynta ym don jingtip eiei shuh halor kata ka jingtohkit CBI.
“Hynrei kumba ka paw, kam don satia kata ka jingtohkit da ka CBI. Hato kane ka dei namar ka Sorkar Pdeng kam kwah ban ktah ïa ka jingsngew jong ka Assam? Lane hato ka dei namar ka Sorkar Pdeng kam kheiñ satia ïa ka Meghalaya halor ka jingjia ha Mukroh? la ong u Bah Ardent.
Utei u nongïalam ka VPP u la pynkynmaw ba hadien ka jingjia ha Mukroh, u Myntri Rangbah Conrad K Sangma u la leit sha Delhi bad u la ïakynduh ïa u Myntri Korbar Ri ha ka 24 tarik Naiwieng, 2022 ban dawa ban phah tohkit ha ka CBI halor ka jingshah siat jong ki briew na Mukroh ha ki bor jong ka sorkar Assam.
Ha kajuh ka por, u MLA ka Nongkrem u la ong ba u Lat u la pynpaw ba ka sorkar jylla ka la thung da ka jingtohkit ba khlieh da u nongbishar ba la shongthait halor ka jingjia ha Mukroh. Tangba u la pynpaw pat ba um sngew skhem la kane ka jingtohkit kan ai ne em ïa ka hok na ka bynta kito ki lanot kiba la khlad ha Mukroh.
Halor ki kam ïakajia pud, u Bah Ardent u la pynpaw ïa ka jingsngew sheptieng halor ka bynta kaba dang sah jong ka jingpynbeit ïa u pud u sam. U la ong ba kano-kano ka kam ba shu leh kyrkieh, ka kylla lehnohei lut.
“Ka daw ba nga kren kumne ka long ba ki paidbah kiba sah ha khappud ki khlem sngewtynnad eiei ha kaba ïadei bad ka jingpynbeit ïa u pud u sam ha ka bynta ka banyngkong. Kiba bun na ki shnong kiba ha West Khasi Hills bad Ri-Bhoi kiba ju don beit bad ka Meghalaya baroh shi katta, ki la leit sha Assam. Ngi la ïohi lyngba ki lad pathai khubor kumno ki paidbah na kito ki shnong ki la ïeng pyrshah ïa ka soskular pynbeit pud lane ka MoU namar kim kwah satia ban don hapoh ka Assam,” la bynrap u Bah Ardent.
Ha kajuh ka por, u la ong ba dei ban ïapynbeit ïa u pud u sam tangba hap ban leh ha ka rukom kaba dei bad da kaba shim lang ïa baroh ha ka por ba ïapynbeit. U la ong ba ym lah satia ban shu leh kyrkieh bad ym lah ban shu ai ei ïa ka khyndew ka shyiap sha ka sorkar Assam.
Haba kren halor kiwei pat ki mat, u Bah Ardent u la ong ba um sngewïahap satia ba ka jingkam jong u Lat ba ka jingshngaiñ jong ki nongshong shnong ka long kaba donkam ban wanrah ïa ka roi ka kiew ha jylla.
“Ha ki san snem ba la leit noh bad haduh mynta hadien ba ka sorkar barim ka la shimti thymmai, ki paidbah ka jylla ki dang im hapdeng ka jingsyier. Ki kam bymman bad be-aiñ ki dang kiew. Jan man la ka sngi ki don beit ki kam tuh kam thiem, kam pynïap briew bad kiwei,” la ong u MLA ka Nongkrem.
Nalorkata, u la ong ba ki don ki briew kiba im hapdeng ka jingtieng bad ki don ki khep ba ki paidbah ki la hap ban shim hi ïa ka aiñ ha kti kumba la jia ha Shangpung ha u Nailur 2022 ha kaba saw ngut ki runar ki la shah bom ïap ha ki paidbah.
Haba kren halor ka thma jong ki pulit ka jylla pyrshah ïa u drok, u nongïalam ka VPP u la ong ba u ai jingïaroh ïa ki pulit namar ka jingtrei ka jong ki ban pynduh ïa u drok khnang ban ïada ïa ki samla na ka jingkylla long kyrni ha une u jingdih ba sniew.
“Hynrei, nga kwah ban ai jingmut ba dei ban leh da kaba tyngeh pyrshah ïa ki nongkhaïi bad nongdie drok. Ngi la ïohi ba mynshwa, kito ki nongkhaïi bad nongdie drok kiba la shah kem, ki la ïoh jamin noh bad ki la leit phai biang ban leh ïa kijuh ki kam,” la ong u Bah Ardent da kaba bynrap ba ki nongkhaïi bad nongdie drok ki dei ban shong patok slem hapoh ki aiñ ba pyrkhing kum ka Meghalaya Preventive Detention Act.
Nalorkata, u la ai jingmut ïa ka sorkar ba kan shna hi ïa ki jaka ai jingsumar na ka bynta kiba ngat ha ka jingdih drok namar ka bai sumar ha ki jaka shimet ka rem shaba palat.
