Nongpoh, Lber 21:
Kawei ka bos Night Super kaba don ïa u nombar AR20-9099 kaba kit ïa kumba 37 ngut ki nongleit nongwan ryngkat bad ki jhur ki jhep sha jrong, ka la kylla noh mar ïa poi ha ka shnong Shangbangla jong ka surok bah National Highway 6.
Kumba la ïoh lum jingtip na ki bor pulit, la ïathuh ba kane ka bos ka dei kaba dang kiew na ka nongbah Guwahati ban leit sha Silchar, hynrei mar ïa poi ha Shangbangla, ka la kylla noh bad poi syndon sha shiliang jong ka surok bah; kata sha ka bynta ban hiar na Shillong sha Guwahati, kat haduh ba bun ngut ki nongshong ha katei ka bos ki la mynsaw jur.
Halor kane ka jingjia, na ka liang ki pulit wut-wut ki la pynkit ïa kiba mynsaw da ka ambulance bad ka 108 sha Nongpoh Civil Hospital bad katto katne ngut na kiba kham mynsaw jur pat la pynkynriah noh sha ki jaka ai jingsumar sha nongbah Guwahati na ka bynta ban ïoh ïa ka jingsumar kaba kham bha.
Shuh shuh la ïoh jingtip ruh ba ka jingkylla jong katei ka bos ka dei namar ka jingthut ne bym treikam shuh ka ‘brake’.
Haba ïoh ban ïakren bad ki nongshong shnong jong ka Shangbangla, ki la pynpaw ïa ka jingsngewkhia jur halor ka jingjia tyngkhuh kali kaba khah-khah ha ka surok bah National Highway 6 khamtam ha ki bynta jong ka shnong. Kumta ki kyntu ruh ïa ki bor ba dei khmih jong ka National Highway Authority of India (NHAI) ba kin buh da ki ‘speed breaker’ ban tem ïa ka jingpynher sted jong ki kali kaba la wanrah bunsien ïa ki jingjia ba sngewsih bad ruh ba ki paidbah ka shnong kin shngaiñ.
