Shillong, Lber 21:
Ka jinglah ban ïalehkai bha da ka Shreya R. Marak ka la pynlong ïa ka South Garo Hills District Cricket Association ban khur ïa ka jingjop ha ka U-14 Girls Inter District Cricket T20 Tournament 2023. Kane ka wan urlong hadien ba ka lah ban pynliem noh ïa ka East Khasi Hills Cricket Association da 21 run ha ka sngi Ba-ar ha Nongpyndeng, West Khasi Hills.
Ha kawei pat ka jingïalehkai hapdeng ka Shillong Cricket Association bad ka West Jaiñtia Hills District Cricket Association, la hap ban pynsangeh noh na ka daw ka jingshah pynthut ha u slap.
Ha katei ka jingïakhun, ka EKH kaba la jop ïa ka jingkynting pisa, ka la ailad shwa ïa ka SGH ba kan tied nyngkong ha kaba ka la kamai 52 run bad khlem shah pynhap wiket ha ki 7 over. Ka Shreya ka la long ka nongtied kaba khlem shah pynhap wiket ha kaba ka la kamai 21 run bad 16 run da ka Kimtera D. Sangma.
Hynrei haba wan beh ïa ka thong, ka EKH ka la kamai tang 31 run bad shah pynkhyllem 6 wiket. Ki nongkawang bol ka SGH kiba la lah ban pynhap wiket ki long ka Shreya (3/5), Dejiansua M. Sangma (2/12) bad ka Mania Sangma (1/2). Ka Shreya ka la ïohpdiang ïa ka nam Player of the Match.
