Shillong, Lber 21:
U Myntri Rangbah ka Jylla u Conrad K Sangma u la ong ba um don eiei satia ban kynthoh halor ka jingshah kynnoh ka Meghalaya kum ka jylla kaba bamsap tam, namar ba ka dei tang ka nia ne jingkynthoh ha ka por ilekshon.
U Conrad u la kren ïa kane haba jubab halor ka jingïatai kaba lyngkot kaba la wanrah da u MLA ka VPP na North Shillong u Bah Adelbert Nongrum hapoh ka ïingdorbar ha ka Sngi Ba-ar.
U Myntri Rangbah u la ong, ha ka por ilekshon ka jingïakawang ktieh ka long na baroh ki liang bad kaba baroh ki leh ym tang ka BJP, hynrei kiwei kiwei ruh ki dkhot ka sorkar synrop ki kynnoh shibun ki jingkynnoh pyrshah ïa ka NPP bad ïa ka sorkar MDA-I, “hynrei ka ilekshon ka la kut bad ïa ka rai la ai. Ka la dei ka por ba ngin trei ryngkat kum ka kynhun,” u la ong.
“Nga lah ban sngewthuh ba katto katne ka jingshit ilekshon kam pat duh bad ngin ïa kynnoh pyrshah iwei ïa iwei, hynrei ka ilekshon mynta ka la kut. Ngi ong ïa kaei kaba ngi hap ban ong ha ka por ilekshon, namar kata ka ju dei ka rukom jong ki ilekshon bad ngi ju ïakhun ilekshon ha kane ka rukom, hynrei haba ki paidbah ki la ai ïa ka rai, ki khmih lynti ïa ngi ban long ki nongïalam kiba don ka jingkitkhlieh bad ban rah bad kyntiew shakhmat ïa ka jylla,” la ong u Conrad.
Shuh shuh u la ong, “Mynta ngi la ïatreilang bad ka BJP bad ka jingwan donlang u Myntri Rangbahduh ka Ri bad u Myntri ka tnat Kam Pohïing ka Ri ha ka jingbam smai u Myntri Rangbah ka jylla bad ka kynhun Myntri jong u, ka kren shai halor ka jingsngew skhem ka sorkar pdeng ïa ka sorkar MDA-II.
Ha shwa kane, u Conrad u la pynsngew ruh hapoh ka ïingdorbar halor kiba bun ki kam kiba la pyndep ha ka sorkar MDA-I. Ha kajuh ka por u la ïathuh ruh ba na ka liang ka Sorkar Pdeng ka la ai jingïaroh ïa ka Meghalaya halor ka jinglah ban pyntrei ïa ka skhim JJM, ka MGNREGA bad kiwei kiwei.
