Shillong, Lber 21:
Ka Khun Hynñiewtrep National Awakening Movement (KHNAM) ka la dawa ba dei ban pynduh noh ïa ka ‘Personal Interview’ ha kaba ïadei bad ka jingpynrung kam ha ka Group B, Group C bad Group D ha ki tnat kam sorkar jylla bapher bapher.
Haba kren sha ki lad pathai khubor ha ka Sngi Ba-ar, u Bah Thomas Passah uba dei u Vice President jong ka KHNAM, u la ong ba ka seng ha ki bnai kiba la dep, ka la leit ban dawa bad buh da ka jingthoh hakhmat ka sorkar barim kata Meghalaya Democratic Alliance (MDA-I) halor ka jingdawa ba dei ban pynduh noh ïa ka Personal Interview ha kaba ïadei bad ka jingthep kam ha ka Group B, Group C bad Group D ha ki tnat bapher bapher jong ka sorkar jylla.
U Bah Thomas u la ong ba ka sorkar pdeng ha ka 16 tarik u Naiwieng 2015, ka la pynmih ïa ka jingpynbna ban pynduh noh ïa ki Personal Interview ha ka Group B, Group C bad Group D bad ha ka 1 tarik u Kyllalyngkot 2016, ka sorkar pdeng ka la weng noh ïa katei ka ‘Personal Interview’ bad haduh 23 tylli ki jylla hapoh ka Ri ki la weng ïa katei ka Personal Interview ha ka Group B, C bad D.
U Bah Thomas Passah u la ong ba katei ka jingdawa ban pynduh noh ïa ka ‘Personal Interview’ ka dei ban pynduh noh ïa ka jingleh shiliang khmat ha kaba ïadei bad ka jingthep kam thep jam ha ki tnat kam sorkar ha ka lynti ka bym dei.
“Na ka liang jong ngi ha kito ki por, ngi la ai da ka jingthoh sha u Myntri Rangbah ka jylla ba ngi ruh ngi dei ban bud ïa kane ka sienjam khnang ba ka rukom thungkam ha ki tnat sorkar bapher bapher kan long kaba itynnad bad ka bym shah shiliang ïano-ïano ruh khnang ba kiba dei hok ban ïoh ïa ka kam kin ïoh,” la ong u Bah Thomas.
Shuh shuh u Bah Thomas u la ong ba ka seng ka la dawa ruh ba ka sorkar jylla kan wanrah noh da ka Recruitment Policy khnang ba ka rukom thung kam thung jam ha ki tnat sorkar bapher bapher kan nym shimpor da ki snem ban thung briew ha ki jaka kiba thylli.
“Ngi kwah ba ka sorkar Meghalaya kan wanrah da ka ‘Recruitment Policy’ khnang ba kan don da ka por ba haba ka sorkar ka khot ïa ka jingpynbna, hapoh shibnai ka dei ban khot noh ïa ka jingthoh eksam ne ka ‘written test’ bad hapoh shi bnai ne ar bnai, ka sorkar ka dei ban pynbna noh ïa ka resol bad thung briew noh hapoh katei ka kam,” la ong u Bah Thomas.
U la ong ba la ïohi ba ki rukom treikam jong ka sorkar ha kaba ïadei bad ka thungkam thungjam ha ki tnad bapher bapher ka long kaba thamula, ka bym beit, kaba ïalam bakla bad kaba pynmut sniew ïa ki khun samla ka jylla.
Na ka liang u Bah Thomas u la kren ruh halor ka jingpynhap jong ka sorkar jylla ïa ka bhah thungkam thungjam ne ka Reservation Policy ha ka Economic Reservation.
“Na ka liang ka jong ngi, kane ruh ka dei kawei na ki mat kiba donkam bha bad ngi khmih lynti ba na ka liang ki nongmihkhmat jong ka sorkar jong ngi kin shimkhia ïa kane,” la ong u Bah Thomas.
Namar kata, u la ong ba kum ka seng nangne shakhmat kan leit pynsngewthuh paidbah sha kylleng ki jaka pule bad ki shnong ki thaw ban pynsngewthuh ïa u paidbah ïa kine ki mat kiba ktah bha. Namar lada kum ka jylla ka leh matlah ïa kum kine ki mat kiba kham kongsan, ka lawei jong ki khun samla kan long kaba dum khamtam lei lei ba ki khun samla ki dei ka budlum jong ka jylla.
