Paris, Lber:
Katkum ka khubor ba la pyllait da ka synjuk pyniaid jingialehkai phutbol jong ka France, ka iathuh ba uwei na ki khlur ialehkai phutbol jong katei ka ri uba la lah ban pynpawnam bha ialade ha ka lympung ialehkai World Cup 2022 kaba long ha Qatar khamtam ha ka jingiakhun phainal bad ka Argentina ha kaba u la lah ban khur ia ka hat-trick (3 kol) sha ka kynhun ialehkai; u Kylian Mbappe, mynta ka sien u lah ioh ban mih bujli noh ha ka jaka jong u rangialehkai ba lah shongthait u Hugo Lloris kum u kapten jong ka kynhun ialehkai baroh kawei.
Ka khubor ka iathuh ruh ba utei u rangialehkai shakhmat jong ka klob ialehkai ba paw ka ri France ka Paris Saint-Germain u lah pdiang ia ka tei ka jingshah tyrwa ka jong u hadien ba u lah dep ban iakren bad iamir jingmut bad u nongpyniaid jong ka kynhun ialehkai ka France u Didier Deschamps. Shuh shuh ruh kawei pat ka khubor ka iathuh ba u Hugo uba long u nongapkol ba pawkhmat jong ka klob Tottenham u lah wanrah noh halade ia ka jingkut noh ka kam ialehkai bar-ri ka jong u ha u bnai K’lyngkot mynta u snem; hadien ba ka kynhun ialehkai bar-ri ka France ka lah mad ia ka jingshah rem noh ha ka jingiakhun phainal ha ka World Cup 2022 ha Qatar.
Kumba ka paw ka long ba u Hugo u lah shakri ia ka kam kum u kapten jong ka kynhun ialehkai ka France lah bun bun snem bad ha kiba bun ki lympung ialehkai World Cup ba ka kynhun ka lah ioh ban shimbynta.
Kumta ruh u rangialehkai ka Atletico Madrid u Antoine Griezmann uba na katei kajuh ka kynhun ialehkai u lah shah jied kum u symbud kapten kata hadien ba u rangialehkai shadien ka Manchester United u Raphael Varane u lah pynwai noh ia ka kam ialehkai ka jong u hadien ba katei ka kynhun ka lah mad ia katei ka jingshah pynliem noh ha ka jingiakhun phainal bad ka Argentina ha ka tei ka lympung ialehkai World Cup ha u bnai Nohprah 2022.
Haba phai sha ka kam ialehkai jong u Mbappe ka long ba utei u rang uba lah ioh ban ialehkai 66 sien na ka kynhun ialehkai ka ri jong u, u lah paw kum uba hakhmat eh napdeng kiwei pat ki para ba ialehkailang na kajuh ka kynhun na ka bynta ban bynshet ha u ia katei ka kyrdan hadien ka jinglah jong u ban kamai ia ki lai kol ha ka jingiakhun World Cup wat hadien ba ka kynhun ka lah shah rem noh ha ka Argentina da ka jingiashut tiebreaker bad uba lah dep ruh ban iarap ia ka kynhun baroh kawei ban rah pat ia ka trophy jingjop na katei ka lympung ialehkai ha u snem 2018.
Kumta utei u rangialehkai barim ka Monaco u long ruh u symbud kapten ha ka klob kaba u ialehkai mynta ka PSG kata hadien u rangialehkai ka Brazil u Marquinhos.
Hadien ba u lah shah pynkhamti mynta kum u kapten jong ka kynhun ialehkai ka France, ka kam ialehkai ba nyngkong ka kynhun hapoh ka jingialam ka jong u kan long ha ka sngi thohdieng ha ka rynsan iaknieh rung sha ka European Championship 2024 pyrshah ia ka Netherlands ha Stade de France.
