Mumbai, Lber:
Ki heh jong ka kynhun Directorate of Revenue Intelligence (DRI) ha kine ki khyndiat sngi ki la ïoh ban kem ïa uwei u briew uba la 70 snem ka rta halor ka jingshah kynnoh ba u la donkti ban khaïi ïa u Heroin uba la jan kot 10 kg uba la shongdor da kumba T. 70 klur na Addis Ababa kaba don ha Ethiopia. Ki heh jong ka kynhun DRI ki la kem ruh ïa u nong Nigerian uba la wan ban shim ïa ka song jong une u drok ha kawei ka Hotel kaba don ha ka nongbah Mumbai.
Hadien ba la ïoh jingtip halor kane ka jijngjia, ka kynhun tohkit ka la leit bad kem ïa u Maheshwaran Rajagopal jong ka Chennai ha ka jaka sangeh liengsuiñ ha Mumbai. U la wan na Addis Ababa da ka liengsuiñ na Ethiop. Haba la khmih bniah ïa ki jingrah jingrong jong u, la ïoh ban kurup ïa u Powder ba la song, ha kaba ynda la khmih bniah la lap ba u dei u Heroin. Ïa une uba la shah kynnoh la rah na ka bynta ka jingtohkit.
U Rajagopal u la ong ba u la ïatreilang ha kane ka kam bad uwei u nong Nigeria, ïa uba la phah ïa u shabar ri na ka bynta ban khaïi drok sha India, la ïathuh ka tyllong khubor kaba la wan na ka seng DRI. Une uba la shah kynnoh u la phla ba u la khaïi ïa u drok sha India na South Africa da kumba san sien ha ki por ba la leit bad pynpoi ïa ki jingsong sha kiba bun ki nong India bad sha ki bar ri kiba shong basah ha kiba bun ki bynta jong ka ri, la ïathuh ka tyllong khubor. U la pynshai shuh shuh da kaba ong ba ïa kine ki song la thmu ban pynpoi sha u nong Nigerian ha ka Hotel ha ka nongbah Mumbai. Haba uba la shah kynnoh u la leit sha ka Hotel na ka bynta ban shim ïa u drok, ma u ruh u la shahkem lang ha ki heh ka kynhun DRI ha ka step jong ka lah sngi U Blei.
Ha kaba ïadei bad kane ka jingjia ka kynhun Anti-Narcotics Cell (ANC) jong ki pulit kaba ju trei na ka bynta ban ïakhun pyrshah ïa ki jingdih pynbuaid ha ka sngi U Blei ki la kem ïa lai ngut ki briew ha Bandra bad la pynshisha ba ki la ïoh ban kurup ïa 5 kilo u Mephedrone uba la kot sha ka T. 10 klur.
Ka kynhun Worli Unit jong ka ANC ka la pynlong ïa ka jingleit pahara ha Bandra haba ki la lap ïa ki lai ngut ki briew kiba la i shan khmat bad haba la bat bad khmih bniah na ki la lap ïa u Mephedrone ba 270 Gram. Ki pulit hadien kane ki la pynlong ïa ka jingleit khynra sha ki jaka sah jong ki, ha kaba la lap ïa u Mephedrone ba 4.7 kg na ka ïingsah jong uwei napdeng kine kiba la shah kynnoh, ïa uba la shah suba ba u la long u nongkhaïi drok.
