Agartala, Lber:
U Myntri Rangbah jong ka jylla Tripura, u Dr. Manik Saha ha ki khyndiat sngi kiba la leit noh u la pyntip ba ka Sorkar Pdeng ka la ai ïa ka jingmynjur ban pynbiang ïa ka mang tyngka kaba haduh T.2000 klur na ka bynta ban pyntreikam ïa ka skhim Jal Jeevan Mission ha ka jylla.
Halor katei ka rai jong ka Sorkar Pdeng, na ka liang u Myntri Rangbah u la ai ïa ka jingkhublei kyrpang ïa u Myntri Rangbahduh jong ka ri – Narendra Modi bad ïa u Myntri ka Tnat Jal Shakti – Gajendra Singh Shekhawat kiba la mynjur ban pyllait ïa katei ka mang tyngka na ka bynta ka jylla Tripura.
Hadien ka jingleit ïashim bynta ha ka prokram kaba la pynlong ha Rabindra Bhavan, na ka liang u Myntri Rangbah ka jylla u la pyntip ba tad haduh kane ka kynti kaba mynta ka jingdon jong ki longïing longsem ha ka jylla Tripura kiba la biang ïa ki kor um dih ki long tang 56%. U la ïathuh ruh ba ka jingmynjur jong ka Sorkar Pdeng ban pyllait ïa T.2000 klur ka pisa na ka bynta ban pyntrei ïa ka skhim JJM ha Tripura na ka bynta u snem 2023-2024 ka kham bun shuh shuh ban ïa ka tyngka ba ka Sorkar Pdeng ka la pyllait ha ki 3 snem kiba la leit noh. Ha katei ka sngi la ïathuh ba na ka liang u Myntri Rangbah ka jylla, u Preisdent ka BJP Tripura – Rajib Bhattacharjee, Symbud Myntri Rangbah barim jong ka jylla – Jishnu Dev Verma ki la let ban ïashim bynta ha ka jingïalang ban pynkup burom ïa ki nongkitkam jong ka seng BJP kiba la lah ban trei shitom tad haduh ba ka BJP ka la ïoh ban rah ïa ka nam jop ha ka ilekhson Ïing Dorbar Thaw Aiñ kaba la dep.
Ha katei ka jingïalang, na ka liang u President ka BJP Tripura ha ka jingai jingkren jong u, u la ong ba ka jingjop jong ka seng BJP ïa ka ilekshon Ïing Dorbar Thaw Aiñ kam shym la dei satia ka jingjop kaba suk namar ki seng saiñ pyrthei kiba don ha ka liang pyrshah ki la trei borbah katba ki lah ban pynkhyllem ïa ka BJP. U la pyntip ba dei na ka jingtrei shitom jong ki nongkit kam ka seng bad kumjuh ruh na ka jingbtin lynti jong u Myntri Rangbahduh – Narendra Modi, Myntri ka Tnat Kam Pohïing – Amit Shah bad u National President ka BJP – JP Nadda ba ka BJP ka la ïoh ban rah biang ïa ka nam jop ha ka jylla Tripura.
