Shillong, Lber 21:
Ka Confederation of Ri Bhoi People (CORP) ha ka 20 tarik mynta u bnai ka la hiar leit jurip ïa ki shnong hapoh ka Raid Nongtung ha Block-II bad lap bun ki kam pynroi ba ka Assam ka la theh ha kine ki shnong khappud.
Ka seng hapoh ka jingïalam u President Bah Bandari Ryntathiang lem bad kiwei ki dkhot ha kane ka jingleit jurip ki la lap ba ka sorkar Assam ka la wanrah bun ki kam pynroi ha ki shnong Block-II kum ki surok, stadium, indoor stadium ha shnong Umlaper bad kiwei. Pynban kaba sngewsih pat ka long na ka sorkar Meghalaya kam shym la ïarap ban ai kam pynroi ïa ki shnong ha Block-II, Raid Nongtung.
Ha ka kyrwoh ba la pyllait da u Bah Shaining Kynta, Finance Secretary CORP Sengkmie u la ong, ha ka jingkynduh ïa ki nongshong shnong kiba dei ki Khasi ha Block-II, ki pynpaw ba ki kwah ban don shapoh jylla Meghalaya namar ki kot ki sla ba ki don ki dei jong ka Meghalaya kum naduh ki EPIC bad ki Register ïa ki jaka jong ki shapoh Meghalaya.
Ki don ruh kiwei ki nongshong shnong ki bym dei ki Khasi kiba sah tangba ki ïoh ban shongsuk shongsaiñ kim salia la ki ngat sha Assam ne Meghalaya. Ka sorkar Meghalaya ka dei ban sngap ïa ka sur ki nongshong shnong Khasi ba don ha katei ka thaiñ, u la ong.
Kumta ka CoRP ka kyntu ïa u Symbud Myntri Rangbah ka jylla Bah Prestone Tynsong ba u dei ban pyrkhat bha ym dei ban pynngat ïa ki 22 tylli ki shnong ha Block-II sha Assam ha ka jingpynbeit pud Meghalaya-Assam. Ka sorkar ka dei ban lum da ka jingïalang ïa ki paidbah nongshong shnong ha Raid Nongtung bad ban sngap ïa ka sur ki paidbah, ong ka kyrwoh.
Ka kyrwoh na ka seng ka ong ruh ba “Ka jingkren u Bah Prestone dang shen ban ong, ba 22 tylli ki shnong ha Block-II ki dei hapoh ka Assam, na ka liang ka seng kam lah ban pdiang da lei lei namar ka sur ki para doh para snam ki kwah ban don hapoh Meghalaya.”
Namar kata, ka seng ka kyntu ïa ka sorkar Meghalaya ba kan shimkhia ban lum ïa ki paidbah ha ka Raid Nongtung naduh ki Rangbah Shnong, ki Sordar Shnong, ki Synjuk Rangbah Shnong, ki Syiem Raid Nongtung ban wad ïa ka jingshisha, na ka liang ka seng kan nym ailad ba kitei ki shnong kin leit sha Assam, la pynkut ka kyrwoh na ka seng.
