New Delhi, Lber:
Na ka liang jong ka kynhun Myntri jong ka tnad ialehkai ka ri, ka pynbna paidbah ba u nongialehkai kawang Sum ba pawnam bha ka ri uba la lah ruh ban khur takma Ksiar ha ka lympung ialehkai Olympic u Neeraj Chopra, un sa leit ban shah hikai bad pyntbit ialade ha ka Gloria Sports Arena kaba ha Turkey na ka bynta ki 61 sngi.
Kumta ha kaba iadei bad katei ka bynta, utei u rangialehkai ba 25 snem ka ri un ioh ia ka jingkyrshan bad jingiarap pisa na ka Target Olympics Podium Scheme (TOPS) na ka bynta katei ka jingleit jong u mynta u snem ruh kumjuh hadien ba u lah ioh ia kajuh ka bynta ha u snem ba lah dep halor katei kajuh sha katei kajuh ka madan ialehkai jong ka ri Turkey, bad mynta u snem un pynkhreh na ka bynta ka jingleit jong u sha ka tei ka ri da kaba mihnoh na la ka jong ka ri ha ka 1 tarik u Iaiong bad u ban iaisah haduh ka 31 tarik u Jymmang 2023.
Shuh shuh ruh ka kynhun Myntri jong ka tnad ialehkai ka ri ka iathuh ba ka Ministry of Youth Affairs and Sports’ (MYAS) Mission Olympic Cell (MOC) ha ka 16 tarik mynta u bnai ki lah mynjur ia ka jingkyrpad jong utei u khlur kawang Sum ka ri na ka bynta ka jingleit hikai pyntbit bad kilan sha katei ka ri na ka bynta ki 61 sngi kynthih.
Kumta ha kane ka sien kaba mynta ruh kumjuh, ka jingnohsynniang bad jingiarap song pisa jong ka TOPS kan lah ha ka ban treikam ha u Neeraj, ha u nongpyniaid jong u; u Klaus Bartonietz bad ha ka Physiotherapist’s Airfare, Boarding & Lodging, Medical Insurance, bad ki jinglut jingsep ha ka jingleit shane shatai ha katei ka ri napdeng kiwei pat ki jinglut jingsep. Ki dkhot ka MOC ki lah pdiang ruh ia ki jingtyrwa na ka bynta ban ai ka jingkyrshan pisa bad ki jingpynlut ha kiba bun sha ki nongialehkai Badminton ka ri kata ka Priyanshu Rajawat bad sha u nongkhur takma Rupa ha ka World Junior Championships u Sankar Muthusamy bad sha u nongkhur takma Ksiar na ka Deaf Olympics u Diksha Dagar.
Shuh shuh ruh ka jingiarap synniang pisa kan kynthup ruh ia ka jingpunbit pynbiang ha ka ban thied ia ki tiar ialehkai tied Golf bad ban shimwai ruh ia u Personal Coach, Fitness & Nutrition Trainer na ka bynta u Dagar bad ka jingnoh synniang pisa jingiarap ia ka jingshimbynta ka Rajawat ha ka Swiss Open, Spain Masters bad Orleans Masters bad ka jingshimbynta u Sankar ha ka Orlen Polish Open bad Slovenia Yonex Open.
